رێكخراوی IMS دانیماركی و میترۆ كۆبونەوە
AM:10:35:06/11/2017
میترۆ، سلێمانی
بەڕێوەبەری بەرنامەكانی عێراق لە رێكخراوی IMS (پاڵپشتی میدیایی نێودەوڵەتی) رایگەیاند هەڵویستی رۆژانەو راپۆرتەكانی سەنتەری میترۆ بۆ داكۆكی لە مافی رۆژنامەنوسان لە ناوەندەكانی داكۆكیكار لە ئازادی رۆژنامەنوسی بە هەند وەردەگیرێت، هیوای خواست بەردەوام بن لەو رێبازی كاركردنەیان.

لە دیدارێكدا كە لە ئۆفیسی رێكخراوی IMS بەڕێوەچوو، ئوسامە هەباهبە دڵخۆشی دەربڕی بەرامبەر كارو چالاكییەكانی سەنتەری میترۆ METRO وتی" زۆر دڵخۆشین بە كاركردنمان لەگەڵ سەنتەرەكەتان كە راستگۆیانە و بە شێوەیەكی سەربەخۆ داكۆكی لە ئازادی رۆژنامەنوسی دەكەن" جەختیكردوە" هەڵویستی رۆژانەو راپۆرتەكانی سەنتەری میترۆ لە ناوەندەكانی داكۆكیكار لە ئازادی رۆژنامەنوسی بە هەند وەردگیرێت".

هەباهبە هیوای خواست میترۆ بەردەوام بێت لەو رێبازەی كاری لەسەر كردوە كە چاوپۆشینەكردن بووە لە پێشێلكاری و خەباتكردن بووە بۆ كۆتایهێنان بە دیاردەی دەربازبوون لە سزا لەو كەیسانەی كە پەیوەندییان بە رۆژنامەنوسانەوە هەیە.

هەروەها بەرێوەبەری سەنتەری میترۆ سوپاسی IMS ی كرد و رایگەیاند سەنتەری میترۆ لەگەڵ هاوبەشەكانیدا لە ڕێكخراوە ناوخۆیی و جیهانییەكان بەردەوام دەبێت لە چالاكی بۆ وەستانەوە بەرامبەر لەمپەرەكانی ئازادی رۆژنامەنوسی.

هەرودلا هاوڕابوون لە ڕێكخستنی چەندین دیدار و كۆبونەوەی فراوان و كۆنفرانس لەسەر ئاستی هەرێمی كوردستان و عێراق بەمەبەستی بەرگرتن لە توندوتیژی بەرامبەر بە میدیاكاران و دۆزینەوەی باشترین ئامراز بۆ كۆتایهێنان توندوتیژی و دەستدرێژی بۆ سەریان.

رێكخراوی IMS رێكخراوێكی قازانج نەویستە، كار بۆ پشتیوانی ئازادی میدیا دەكات لەو ناوچانەی كە بە هۆی شەڕو ململانێی چەكداری زەرەرمەند بوون و بە قۆناغی راگوزەردا تێدەپەڕن. ئەو رێكخراوەی لە 40 وڵاتدا كار دەكات.