نووسه‌ره‌ گه‌وره‌كان چۆن دەنووسن؟
PM:12:31:11/01/2018
میترۆ
له‌م رۆژانه‌دا له‌ ناوه‌ندی كه‌لتووریی تاراندا كتێبی «بام تا شام نویسندگان چگونه‌ میگژرد؟- رۆژ تا ئێواره‌ی نووسه‌ران چۆن ده‌گوزه‌رێ؟» ده‌ستا و ده‌ستی پێده‌كرێ و ده‌خوێنرێته‌وه‌، ئه‌م كتێبه‌ كه‌ سێ كه‌س به‌ سێ ناونیشانی جیا ته‌رجه‌مه‌یان كردووه‌، سه‌باره‌ت به‌ خوو و نه‌ریتی ( 162) مرۆڤی به‌ناوبانگه‌ كه‌ له‌ ماوه‌ی چوارسه‌د ساڵی رابردوودا كلتووری خۆرئاوایان پێكهێناوه‌. له‌ فه‌یله‌سووف و داهێنه‌ر و فیزیازانه‌وه‌ بگره‌ هه‌تا وێنه‌كێش و مۆسیقار و ئه‌ندازیار و ده‌روونناس و ده‌رهێنه‌ر، و بێگومان رۆماننووس و چیرۆكنووسیش.

له‌ناو ئه‌و مرۆڤه‌ گه‌ورانه‌دا، ژیانی رۆژانه‌ی ئه‌دیبه‌كان به‌لای منه‌وه‌ گرنگتربوو، چونكه‌ چیرۆكنووسین گرنگترین خولیای منه‌. بۆیه‌ كاتم ته‌رخانكرد و خوو و نه‌ریت یان شێوازی كاركردنی ئه‌وانم جیاكرده‌وه‌ و لێكۆڵینه‌وه‌یه‌كی ئاسانم كرد. پێم خراپ نه‌بوو ئه‌نجامه‌كه‌ی بخه‌مه‌ به‌رده‌ستی ئێوه‌ش كه‌ له‌ چه‌ند روویه‌كه‌وه‌ به‌لامه‌وه‌ سه‌رنجڕاكێش بوو.

*بایه‌خی رۆماننووسان و چیرۆكنووسان
(73) كه‌س له‌م مرۆڤه‌ مه‌زنانه‌ به‌ دیاریكراوی رۆماننووسن. واته‌ نزیكه‌ی (45%). لێره‌دا باسی ئه‌و شاعیر و شانۆنامه‌نووسانه‌م نه‌كردووه‌ كه‌ رۆمانیان نه‌نووسیوه‌. هه‌ڵبه‌ته‌ ئه‌گه‌ر وه‌كو سارته‌ر فه‌یله‌سووف بووبن و له‌ رۆمانیشدا به‌ناوبانگ بووبن، ناویانم خستۆته‌ لیسته‌كه‌مه‌وه‌. سارته‌ر ته‌نانه‌ت خه‌ڵاتی نۆبڵیشی درایه‌، به‌ڵام ره‌تیكرده‌وه‌. ژماره‌ی زۆری رۆماننووسان له‌م كتێبه‌دا بایه‌خ و ناوبانگیان له‌ناو ناوداران و ئه‌ندازیارانی كلتووری خۆرئاوادا نیشان ده‌دات. هه‌ڵبه‌ته‌ له‌ روویه‌كی دیكه‌وه‌ ده‌توانرێت بگوترێت له‌به‌رئه‌وه‌ی ئه‌م كتێبه‌ سه‌باره‌ت به‌ شێوازی كاركردنی مرۆڤه‌ مه‌زنه‌كانه‌، بوونی ژماره‌یه‌كی زۆری رۆماننووس تیایدا، نیشانه‌ی ئه‌و خاڵه‌ گرنگه‌یه‌ كه‌ وه‌ك بڵێی له‌ناو هه‌موو ناوداراندا، نه‌ریتی كاركردنی رۆماننووسان گرنگییه‌كی زیاتری هه‌یه‌.

*سیستم له‌ نووسیندا
له‌ناو ئه‌و (73) كه‌سه‌دا، جۆره‌ها مرۆڤ هه‌یه‌ به‌ جۆره‌ها خوو و خده‌وه‌، كه‌ له‌ درێژه‌ی ئه‌م بابه‌ته‌دا ئاماژه‌یان بۆ ده‌كه‌ین. به‌ڵام ته‌قریبه‌ن زۆرینه‌یان یه‌ك خاسیه‌تیان هه‌یه‌: ئه‌ویش سیستمی رۆژانه‌ی كاركردنه‌. له‌م باره‌یه‌وه‌ هه‌ندێ قسه‌ی سه‌رنجڕاكێشیان ده‌هێنمه‌وه‌. لیۆن تۆڵستۆی: «ده‌بێ هه‌موو رۆژێك بنووسم و هیچ رۆژێك له‌ كیسی خۆم نه‌ده‌م. ئه‌مه‌ زیاتر له‌وه‌ی بۆ سه‌ركه‌وتن له‌ نووسیندا پێویست بێت، یارمه‌تیم ده‌دات بۆ ئه‌وه‌ی جڵه‌وی كاری رۆژانه‌م له‌ ده‌ست ده‌رنه‌چێت.» گۆستاڤ فلۆبیر: «له‌ ژیاندا وه‌كو بۆرجوازێك رێك و پێك و به‌ ته‌رتیب به‌ بۆ ئه‌وه‌ی بتوانی له‌ كاره‌كه‌تدا ره‌سه‌ن و بێ ره‌حم بیت.». هێنری میله‌ر: «بۆ پاراستنی ساته‌ راسته‌قینه‌كانی روانینی هونه‌ریی، ده‌بێت زۆر به‌ دیسپلین بیت و دیسپلین به‌ ژیان ببه‌خشیت.» هاروكی موراكامی: «به‌بێ هیچ گۆڕانكارییه‌ك پابه‌ندم به‌ به‌رنامه‌ی رۆژانه‌مه‌وه‌ كه‌ بریتییه‌ له‌ ( له‌ خه‌و هه‌ڵسان سه‌عات چواری به‌یانی/پێنج شه‌ش سه‌عات نووسین به‌ به‌رده‌وامیی/ وه‌رزش/ خوێندنه‌وه‌/گوێگرتن له‌ مۆسیقا/چوونه‌ ناو جێگه‌ی خه‌وتن سه‌عات نۆی شه‌و). ئه‌وه‌ی گرنگه‌ دووباره‌كردنه‌وه‌ی ئه‌م كاره‌یه‌، جۆره‌ هیپنۆتیزمێكه‌. خۆم هیپنۆتیزم ده‌كه‌م بۆ ئه‌وه‌ی قووڵیی زیهنم زیاد بكه‌م.» چه‌ك كلۆز: «ئامێره‌كان چاوه‌ڕێی ئیلهامن، به‌ڵام ئێمه‌ ده‌چینه‌ سه‌ركار و ده‌ستبه‌كارده‌بین.»

به‌ وردبوونه‌وه‌ی زیاتر له‌ ژیانی ئه‌و مه‌زنانه‌ی له‌م كتێبه‌دا ناویان هاتووه‌، هه‌ستم به‌وه‌ كرد نووسه‌ران دیسپلینێكی زیاتریان هه‌یه‌ له‌وانی تر. له‌وانه‌یه‌ ئه‌مه‌ش ئاسایی بێت. چونكه‌ ته‌قریبه‌ن ناتوانی به‌لای كه‌مه‌وه‌ به‌بێ ئه‌وه‌ی رۆژی سێ سه‌عات به‌ رێك وپێكی و به‌رده‌وامی بنووسی، به‌رهه‌مێكی وا بخوڵقێنی كه‌ شایانی باس بێـت. مایه‌ی سه‌رنجه‌ چارلس دیكنز ئه‌وه‌نده‌ ملكه‌چی به‌رنامه‌كه‌ی خۆی بوو، ئه‌گه‌ر هیچیشی نه‌بووایه‌ بۆ نووسین، له‌ هه‌مان كاتی هه‌میشه‌ییدا له‌سه‌ر مێزه‌كه‌ی داده‌نیشت و خه‌تی به‌ كاغه‌زه‌كاندا ده‌هێنا.

وێڕای ئه‌مه‌ش ناوداران هه‌میشه‌ سه‌رساممان ده‌كه‌ن، بۆ خۆم پێم وا بوو مه‌حاڵه‌ به‌بێ سیستمێكی دیاریكرا و بتوانی بنووسیت، به‌ڵام پێنج كه‌س له‌م (73) كه‌سه‌ نزیكه‌ی (7%) به‌شێوه‌یه‌كی سیستماتیك نه‌یانده‌نووسی و هه‌ركاتێ ئیلهامیان بۆ بهاتایه‌ ده‌یاننووسی. وه‌كو «ئان بیتی» یان «جۆرج سیمنۆن». بێگومان سیمنۆن له‌م هه‌ڵمه‌تی ئیلهامه‌دا، ئه‌وه‌نده‌ی نووسیوه‌، كه‌ تۆڵه‌ی رۆژانی بێكاریشی كردۆته‌وه‌، سیمنۆن جاریوا بووه‌ هه‌موو رۆژێ (هه‌شتا لاپه‌ڕه‌)ی نووسیوه‌ (نزیكه‌ی بیست هه‌زار وشه‌) كه‌ به‌ڕاستی باوه‌ڕپێكردنی قورسه‌. به‌ڵام ئه‌گه‌ر بزانین ئه‌م پیاوه‌ سه‌یره‌ (450) رۆمانی نووسیوه‌، ئیتر بواری سه‌رسوڕمانمان نییه‌.

*رۆژ یان شه‌و، ئایا مه‌سه‌له‌كه‌ ئه‌وه‌یه‌؟
فیلم و رۆمان و شانۆگه‌رییه‌كان پڕن له‌و دیمه‌نانه‌ی كه‌ نووسه‌ران له‌ نیوه‌شه‌ودا، له‌به‌ر رووناكی مۆم نیشان ده‌ده‌ن. یان به‌ره‌به‌یان كه‌ نووسه‌ر پاش شه‌وێك نووسینی زۆر، قه‌ڵه‌مه‌كه‌ی داده‌نێ. له‌ راستیدا، له‌گه‌ڵ ئه‌وه‌دا كه‌ خۆم له‌وانه‌ی به‌شی دووه‌مم و ئاسایی سه‌عات پێنج بۆ هه‌شتی به‌یانی باشترین كاتی نووسینمه‌، باوه‌ڕم وابوو نووسه‌ران زیاتر شه‌و ده‌نووسن. به‌ڵام كه‌ ئامارم وه‌رگرت، به‌ڕاستی سه‌رسام بووم. له‌و (73) رۆماننووسه‌ گه‌وره‌یه‌ ته‌نیا و ته‌نیا (12) كه‌سیان (16%) شه‌و ده‌یاننووسی. باقیه‌كه‌یان به‌یانییان ده‌یاننووسی، راستت ده‌وێت، به‌ره‌به‌یان نووسین زۆر به‌لایانه‌وه‌ ته‌واو باو بووه‌، واته‌ سه‌عات چوار، پێنج، شه‌ش له‌ خه‌و هه‌ڵسان و ده‌ستكردن به‌ نووسین. بێچه‌ند و چوون ده‌توانم پێتان بڵێم له‌و (61) كه‌سه‌ی به‌یانییان ده‌یاننووسی، ته‌قریبه‌ن هیچیان دره‌نگتر له‌ سه‌عات هه‌شت له‌ خه‌و هه‌ڵنه‌ساون. ئه‌وه‌ی مایه‌ی سه‌رنجه‌ له‌ گه‌شت و گه‌ڕانمدا سه‌باره‌ت به‌ فاكته‌ره‌كانی داهێنان، لێكۆڵینه‌وه‌یه‌كی دوور و درێژی دكتۆر «تراڤیس برادبه‌ری»م هاته‌ڕێ كه‌ شه‌ش سیفه‌تی مرۆڤی داهێنه‌ری ژماردووه‌ و یه‌كه‌میان به‌ره‌به‌یان له‌ خه‌و هه‌ڵسانه‌.

هه‌ڵبه‌ته‌ ده‌بێ ئاگاشت له‌وه‌ بێت لێكۆڵینه‌وه‌ی تر سه‌باره‌ت به‌ زۆرترین توانای به‌رهه‌می مێشك ئه‌وه‌ی نیشانداوه‌ كه‌ نه‌ریتی كاری سیستماتیك، بایه‌خێكی زۆرتری هه‌یه‌ له‌و سه‌عاته‌ كه‌ تیایدا ده‌ستبه‌كارده‌كه‌یت. هه‌ربۆیه‌ پێویست ناكات زۆر گوێ به‌وه‌ بده‌یت چ كاتێ ده‌نووسیت. گرنگ ئه‌وه‌یه‌ له‌ هه‌مان سه‌عاتی دیاریكراودا ده‌ستبه‌كار بیت. بۆ نموونه‌ هه‌ردوو خانمی رۆماننووس ئه‌لیس مۆنرۆ و تۆنی مۆریسۆن، كه‌ هه‌ردووكیان خه‌ڵاتی نۆبڵیان وه‌رگرتووه‌. له‌ سه‌ره‌تای نووسینیاندا به‌هۆی به‌خێوكردنی مناڵه‌وه‌ ناچاربوون پاش نیوه‌ڕوان یان شه‌و بنووسن، به‌ڵام كاتێ مناڵه‌كانیان گه‌وره‌ بوون نه‌ریتی نووسینی خۆیان خسته‌ به‌یانییان. هه‌ڵبه‌ته‌ له‌ هه‌ردوو قۆناغه‌كه‌دا به‌رهه‌می پله‌ یه‌كیان داهێناوه‌.

*ئالووده‌بوون
له‌ راستیدا هه‌میشه‌ گومانم هه‌بوو به‌ ئالووده‌بوون به‌ ماده‌ی بێهۆشكه‌ر یان سه‌رخۆشكه‌ر ناتوانی ببیته‌ نووسه‌ر یان كه‌سێكی كاریگه‌ر. چونكه‌ ته‌قریبه‌ن له‌ زه‌مانی لاویمه‌وه‌ زۆر زۆر كه‌سی به‌توانای ئالووده‌م دیبوو كه‌ نه‌یانتوانیبوو به‌رده‌وامیی به‌كاره‌كه‌یان بده‌ن و نابووت ببوون. له‌لایه‌كی دیكه‌وه‌ زۆر له‌ گه‌نجه‌كان پێیان وایه‌ به‌بێ ماده‌ی هۆشبه‌ر ناتوانی ببیته‌ داهێنه‌ر یان به‌ قسه‌ی خۆیان ببیته‌ بێوێنه‌. خوێندنه‌وه‌ی ژیانی ناوداره‌كانی ئه‌م كتێبه‌ ئه‌وه‌ نیشانده‌دات، نه‌ بۆچوونه‌كه‌ی من ته‌واو راسته‌ نه‌ هی ئه‌و گه‌نجه‌ گه‌شبینانه‌.
خۆشبه‌ختانه‌ ژماره‌ی ئالووده‌بووان له‌ناو رۆماننووساندا زۆر كه‌متره‌ له‌ ژماره‌ی باقی ناوداران، له‌ناو ئه‌و (73)كه‌سه‌دا ته‌نیا ئاماژه‌ بۆ (6)كه‌س كراوه‌ كه‌ ئالووده‌ی ماده‌ی بیهۆشكه‌ر یان مه‌شروب بوون.

*وه‌رزش
دكتۆر برادبه‌ری وه‌رزشی رۆژانه‌ به‌ دووه‌م فاكته‌ری داهێنان له‌ قه‌ڵه‌م ده‌دات. له‌ راستیدا گومانم ده‌كرد كه‌ بلیمه‌ته‌كانی ئه‌ده‌ب و هونه‌ر و كه‌لتوور به‌گشتی ئه‌هلی وه‌رزش نه‌بن. به‌ڵام به‌لامه‌وه‌ سه‌یر بوو كه‌ نزیكه‌ی (40%) ئه‌و مرۆڤه‌ مه‌زنانه‌ی له‌م كتێبه‌دا ناویان هاتووه‌، ئه‌هلی چالاكی وه‌رزشی رۆژانه‌ بوون. هه‌ڵبه‌ته‌ له‌م بواره‌دا، رۆماننووسان وه‌زعیان خراپتره‌. له‌ناو ئه‌و (73)كه‌سه‌دا كه‌ ژیاننامه‌یان نووسراوه‌. ته‌نیا (17) كه‌سیان واته‌ (23%) به‌ راشكاوی گوتراوه‌ ئه‌هلی وه‌رزش بوون. بۆ نموونه‌ ڤیكتۆر هۆگۆ به‌لای كه‌مه‌وه‌ رۆژی دوو سه‌عات و چارلس دیكنز سێ سه‌عات به‌رده‌وام به‌ پێ رۆیشتوون. به‌ڵام سه‌یرترین حاڵه‌تی وه‌رزشكردن له‌ناو نووسه‌راندا هی كه‌سێكه‌ كه‌ ره‌نگه‌ ئێوه‌ش به‌ بیستنی ناوه‌كه‌ی له‌گه‌ڵ مندا سه‌رسام بن، ئه‌ویش فرانز كافكایه‌. به‌ڵێ ئه‌م داهێنه‌ره‌ گه‌وره‌یه‌ی ئه‌ده‌بی مۆدێرن، هه‌موو به‌یانییه‌ك، ده‌ ده‌قه‌ به‌ رووتی له‌به‌ر ئاوێنه‌ وه‌رزشی ده‌كرد، پاشان جلی له‌به‌رده‌كرد و یه‌ك سه‌عات به‌ پێ ده‌ڕۆیشت. به‌وه‌شه‌وه‌ نه‌ده‌وه‌ستا و هه‌میشه‌، پاش نووسین و پێش خه‌وتن، دیسان به‌لای كه‌مه‌وه‌ ده‌ ده‌قه‌ وه‌رزشی ده‌كرد.

*سه‌عاته‌كانی نووسین
هه‌روه‌كو گوترا، نزیكه‌ی (93%) رۆماننووسه‌ گه‌وره‌كان، ته‌قریبه‌ن هه‌موو رۆژێ ده‌یاننووسی، به‌ڵام سه‌باره‌ت به‌ راده‌ی ئه‌و سه‌عاتانه‌ی ده‌یاننووسی ناتوانرێ ئامارێكی ورد بخرێته‌ڕوو. چونكه‌ به‌ڕاستی هه‌مه‌جۆره‌ ره‌فتاریان ده‌كرد. له‌ناو ئه‌واندا نووسه‌ری وه‌كو «گیرترود ستاین» هه‌یه‌ كه‌ رۆژی نیو سه‌عات ده‌ینووسی و هه‌ندێكی وه‌كو «جۆیس كارۆل ئۆتس»هه‌یه‌ كه‌ (زیاتر له‌ 50 رۆمان و 36 كۆمه‌ڵه‌چیرۆك و ژماره‌یه‌كی زۆر كۆمه‌ڵه‌ شیعر و شانۆگه‌ری و نامه‌ و وتار)ی نووسیوه‌، هه‌موو رۆژێ له‌ هه‌شتی به‌یانییه‌وه‌ هه‌تا یه‌كی پاشنیوه‌ڕۆ پاشان له‌ چواری عه‌سره‌وه‌ بۆ حه‌وتی ئێواره‌ و هه‌ندێ رۆژیش یه‌ك دوو سه‌عات دوای نانخواردنی ئێواره‌ش ده‌نووسێت. هه‌ڵبه‌ته‌ نووسه‌رانی وه‌كو «ستیفن كینگ» و «گراهام گرین»یش هه‌ن كه‌ زیاتر حسابیان بۆ قه‌باره‌ی نووسینی رۆژانه‌یان كردووه‌ تا سه‌عاته‌كانی نووسین. كینگ رۆژی دوو هه‌زار وشه‌ و گرین رۆژی پێنج سه‌د وشه‌ی ده‌نووسی، دواتر له‌سه‌ر مێزه‌كه‌یان هه‌ڵده‌سان. كینگ هێشتا له‌سه‌ر ئه‌م خووه‌ به‌رده‌وامه‌.

*حاڵه‌تی سه‌یر و سه‌مه‌ره‌
ئێستا ئیتر كه‌ به‌ ژماره‌ كه‌م و زۆر خوو و نه‌ریتی رۆژانه‌ی رۆماننووسانمان بینی، خراپ نییه‌ به‌ هه‌ندێ خووی سه‌یر و سه‌مه‌ره‌شیان ئاشنا بین.
*»تۆماس وۆڵف» و «ئه‌رنێست هه‌مه‌نگوای» به‌پێوه‌ ده‌یاننووسی. وۆڵف كه‌ باڵای نزیكه‌ی دوو مه‌تر بووه‌، وه‌ره‌قه‌كانی له‌ سه‌ر سه‌لاجه‌ داده‌نا و ده‌یننووسی، هه‌مه‌نگوایش له‌سه‌ر ره‌فه‌ی سه‌ره‌وه‌ی كتێبخانه‌كه‌ی ده‌ینووسی.

*»ئه‌نتۆنی ترۆلۆپ» كه‌ له‌ ماوه‌ی سی ساڵدا (47) به‌رهه‌می چیرۆك و رۆمان و (16) كتێبی له‌ بواری دیكه‌دا نووسیوه‌. پاره‌ی داوه‌ به‌ خزمه‌تكاره‌كه‌ی بۆئه‌وه‌ی هه‌موو رۆژێك سه‌عات پێنج و نیوی به‌یانی به‌ زۆر خه‌به‌ری بكاته‌وه‌. هه‌موو رۆژێك هه‌تا هه‌شت و نیوی به‌یانی نووسیویه‌تی. حاڵه‌تی وا هه‌بووه‌ بۆ نموونه‌ سه‌عات حه‌وت رۆمانه‌كه‌ی ته‌واو كردووه‌. یه‌كسه‌ر كاغه‌زی دیكه‌ی هێناوه‌ و ده‌ستیكردووه‌ به‌ نووسینی رۆمانێكی تازه‌ و هه‌تا هه‌شت و نیو لێی نووسیوه‌.

*جه‌یمس جۆیس حه‌وت ساڵ به‌رده‌وام خه‌ریكی نووسینی ئۆلیس بوو. به‌پێی حساب و كیتابی خۆی، ئه‌م شاكاره‌ (20 هه‌زار سه‌عات)ی پێچووه‌، له‌ ماوه‌ی ئه‌م رۆمانه‌دا هه‌شت جار نه‌خۆش كه‌وتووه‌ و (19)جاریش ئه‌دره‌سی خۆی گۆڕیوه‌ (له‌ نه‌مساوه‌ بگره‌ بۆ سویسرا و ئیتالیا و فه‌ره‌نسا.)
*»ئاگاسا كریستی» ته‌نانه‌ت دوای بڵاوكردنه‌وه‌ی (10) رۆمانی سه‌ركه‌وتوو، خۆی به‌ نووسه‌رێكی شایسته‌ نه‌ده‌زانی و له‌ كاتی فۆرم پڕكردنه‌وه‌دا بۆ پیشه‌كه‌ی ده‌ینووسی: ژنی ماڵه‌وه‌.

*جۆن چیڤه‌ر هه‌موو رۆژێك هاوكات له‌گه‌ڵ باقی كارمه‌ندانی ئه‌و ته‌لاره‌دا كه‌ تیا ده‌ژیا، حه‌مامی ده‌كرد و نانی به‌یانی ده‌خوارد و چاكه‌ت و پانتۆڵی له‌به‌رده‌كرد و ده‌چووه‌ ناو ئه‌سانسۆره‌وه‌ به‌ڵام له‌ ئه‌پارتمانه‌كه‌ نه‌ده‌چووه‌ ده‌ره‌وه‌. ده‌چووه‌ گه‌نجینه‌یه‌كه‌وه‌ و جله‌كانی داده‌كه‌ند و به‌ جلوبه‌رگی ژێره‌وه‌ هه‌تا نیوه‌رۆ ده‌ینووسی. پاشان خۆی ده‌گۆڕی و بۆ نانی نیوه‌ڕۆ ده‌هاته‌وه‌ بۆ ته‌لاره‌كه‌ی خۆی.

*له‌ كۆتاییدا سه‌رنجێكی كورتی به‌رنامه‌ی رۆژانه‌ی به‌لزاك ده‌ده‌ین. ئه‌و كابرا سه‌یره‌ی له‌ ماوه‌ی (32) ساڵی نووسیندا (90) رۆمان و (20) كتێبی له‌ بواری دیكه‌دا نووسی: «سه‌عات شه‌شی ئێواره‌: خواردنێكی سووكی ده‌خوارد و دواتر ده‌خه‌وت/ سه‌عات یه‌كی دوای نیوه‌شه‌و هه‌ڵده‌سا/ حه‌وت سه‌عات ده‌ینووسی/ له‌ سه‌عات هه‌شته‌وه‌ هه‌تا نۆ ونیو ده‌خه‌وته‌وه‌/ له‌ سه‌عات نۆ و نیوه‌وه‌ هه‌تا چواری عه‌سر دیسان ده‌ینووسی/ دواتر پیاسه‌ی ده‌كرد/ ئینجا خۆی ده‌شۆد و هاوڕێكانی ده‌بینی هه‌تا سه‌عات شه‌ش/ پاشان خواردنێكی سووكی ده‌خوارد و ده‌خه‌وته‌وه‌…»


محمد حسین شهسواری
له‌ فارسییه‌وه‌: محه‌مه‌د كه‌ریم

كوردستانی‌ نوێ‌