راگه‌یه‌ندراوێك له‌ ده‌زگای‌ خه‌ندانه‌وه‌ لەبارەی هێرشكردنە سەر تیمی رۆژنامەوانی‌ خه‌ندان
PM:06:39:10/05/2018

میترۆ، خه‌ندان 
بەڕێوەبەری ژوری هەواڵی خەندان ڕاگەیەندراوێكی لەبارەی هێرشكردنە سەر تیمی رۆژنامەوانی كەناڵی خەندان بڵاوكردەوەو رایگەیاند، بەرپرسیارێتی گیانی سەرجەم ڕۆژنامەنووسانمان و تیمی ڕۆژنامەوانیمان دەخەینە ئەستۆی لایەنی دەسەڵاتدار و هێزەئەمنییەكان.

لە راگەیەندراوێكدا شوان هەركی، بەڕێوەبەری ژوری هەواڵی خەندان ئاماژەی بەوەكردووە، "ئەمڕۆ لە كاتی ڕوماڵكردنی دەنگدانی تایبەتدا بۆ هەڵبژاردنی ئەنجومەنی نوێنەرانی عێراق لە چەند ناوچەیەك هێرشكراوەتە سەر تیمی ڕۆژنامەوانی خەندان و بەشێك لە كەرەستە ڕۆژنامەوانییەكانیان شكێندراوە و لە چەند شوێنێكیش ڕێگەنەدراوە كە ڕوماڵ بكەن".

هەروەها هاتووە، "ئێمە بەرپرسیارێتی گیانی سەرجەم ڕۆژنامەنووسانمان و تیمی ڕۆژنامەوانیمان دەخەینە ئەستۆی لایەنی دەسەڵاتدار و هێزەئەمنییەكان و لەسەر ئەو پێشێلكاریانەی بەرامبەر تیمەكانمان ئەنجامدراوە و داوای یاسایی لەسەر ئەو لایەنانەی پێشێلكاریان كردووە تۆماردەكەین".

شوان هەركی ڕاشیدەگەیەنێت، "ئەو فشارانە كاریگەری نابێت لەوەی خەندان بەردەوامبێت لە ڕووماڵی پیشەییانەی خۆی و سورتر دەبین لەوەی كە زانیارییەكان بە ڕاستگۆیی بگوێزینەوە و خەندان هی هەمووان بێت".