دەستگیرانەكەی خاشقچی: باوەڕناكەم جەمال كوژرابێت
PM:02:23:08/10/2018


میترۆ، KNN 
رەجەب تەیب ئەردۆغان، بە شەخسیی سەرپەرشتی دۆسیەی لێكۆڵینەوەی دیارنەمانی جەمال خاشقچی رۆژنامەنوسی دیاری سعودی دەكات، كە لە رۆژی سێشەممەوە دوای سەردانی بۆ بارەگای كونسوڵخانەی سعودیە لە ئیستەنبوڵ چارەنوسی نادیارە.

ئەردۆغان دەڵێت: دەرەنجامی لێكۆڵینەوەكان هەرچۆنێك بێت، دەستگیرانە توركەكەشی دەڵێت: باوەڕناكەم جەمال كوژرابێت. 

ماوەی چەند رۆژێكە ژیان و چارەنوسی جەمال خاشقچی، رۆژنامەنوسی دیاری سعودی لەناو بارەگای كونسوڵخانەی سعودیە لە ئیستەنبوڵ بووەتە جێی باسی میدیاكان، بۆ ئەو دۆسیەیە ئەردۆغان و راوێژكارەكەی و بەرپرسانی حكومەتەكەی لەسەر خەتن و بەرپرسانی سعودیەشیان هێناوەتە سەرخەت. 

جەمال خاشقچی، رۆژنامەنوسی دیاری سعودیەیەو لە رۆژنامەكانی ئەو وڵاتە كاری كردوەو چەندین وتارو لێكۆڵینەوەی كردوەو نوسیوە. دواتر راوێژكاری شازادە توركی فەیسەڵ سەرۆكی پێشووی دەزگای هەواڵگریی سعودی بوەو چەندین پۆست و ئەركی دیكەی هەبووە. 

بە درێژایی ساڵی رابردو خاشقچی لە رێگەی نوسینەكانیەوە لە رۆژنامەی واشنتۆن پۆست رەخنەی لە دەسەڵاتدارانی سعودی و سیاسەتەكانی وڵاتەكەی گرتووە لە پرسی قەتەرو پەیوەندی ریاز لەگەڵ كەنەداو مافی مرۆڤ لەناو سعودیەو پرسی راوەدونان و دەستگیركردنی بەرهەڵستكارانی سعودی و دژی شەڕی دەسەڵاتدارانی سعودیەو هاوپەیمانەكانی بووە بۆ سەر یەمەن و رەخنەو قسەی هەبووە لە چەندین دۆسیەی دیكەدا، هەر بۆیە ساڵی رابردوو سعودیەی بەجێهێشتوەو رویشتووە ئەمریكا. 

جەمال خاشقچی، رۆژی سێشەممە بە یاوەری خەدیجە ئازروی هاوڵاتی توركی و دەستگیرانی دەچێت بۆ كونسوڵخانەی سعودیە لە ئیستەنبوڵ، بە مەبەستی دەرهێنانی چەند بەڵگەنامەیەكی هاوسەرگیریی و جیابونەوەی لە هاوسەرەكەی پێشووی. بەڵام دەستگیرانە توركەكەی دەڵێت: بەدرێژایی ئەو رۆژە لە كاتژمێر یەكی نیوەڕۆوە تا نیوە شەو لەبەردەم كونسوڵخانەی سعودیە چاوەڕێی كردووە، بەڵام نەهاتووەتە دەرەوە، رۆژی دواتریش چووەتە بەردەم كونسوڵخانەكە، بەڵام هەر دیار نەبووە.  

دەستگیرانە توركەكەی دەڵێت: لە كاتێكدا چوون بۆ كونسوڵخانەی سعودیە، جەمال ترسی لێنیشتبوو نیگەران بوو. 

پێشی وتم ئەگەر نەهاتمە دەرەوە، بە تەلەفۆنەكەم پەیوەندیی بكە بە راوێژكاری سەرۆك كۆماری توركیاوە. 

دەستگیرانەكەی لە تویتێكدا دەڵێت: باوەڕناكەم جەمال كوژرابێت، بەڵام بەرپرسانی ئەمنی و سیاسی توركیا پێیانوایە جەمال خاشقچی، لەناو بارەگای كونسوڵخانەی سعودیە دوای ئەشكەنجەدانی كوژراوەو دواتر تەرمەكەی براوەتە دەرەوەی كونسوڵخانەكە، بەرپرسانی كونسوڵخانەی سعودیەش لە ئەستەنبوڵ ئەو تۆمەتە رەت دەكەنەوە. 
یاسین ئاكتای، راوێژكاری سەرۆك كۆماری توركیاو هاوڕێی نزیكی رۆژنامەنوسی سعودی جەمال خاشقچی، پێیوایە خاشقچی لەناو بارەگای كونسوڵخانەی سعودیە لە توركیادا كوژرابێت.  

لە ئێستادا وەفدێكی ئەمنی سعودیی، كە لە چەند لێكۆڵەرێك پێكدێن، لەسەر داوای توركیا لە ئیستەنبوڵن و لێكۆڵینەوەی ورد دەكەن لەو دۆسیەیە، بەڵام شازادە محەمەد بن سەلمان، جێنشینی سعودیە بە ئاژانسی بلومبێرگی راگەیاندووە، خاشقچی هاوڵاتیەكی سعودیەو بە پەرۆشن بۆ ئەوەی چارەنوسی بزانن. 

وتوشیەتی، خاشقچی كاتێك چووەتە كونسوڵخانەی سعودیە لە ئیستەنبوڵ، بۆ ماوەیەكی كەم كونسوڵخانەكەی بەجێهێشتوە. 

هاوكات سەرچاوەیەكی ئەمنی توركیا رایدەگەیەنێت، ئەو رۆژەی خاشقچی دیار نەماوە گروپێكی 15 كەسی سعودی، كە چەند بەرپرسێكیان تیادابووە، بە دوو فڕۆكە گەیشتونەتە ئیستەنبوڵ و بۆ ماوەیەكی كەم چونەتە كونسوڵخانەی سعودیە، بەڵام دواتر ئەو كەسانە توركیایان بەجێهێشتووە.