تۆڕی میدیایی رووداو لەلایەن نەتەوەیەکگرتووەکانەوە خەڵاتکرا
PM:03:13:07/12/2018

میترۆ، رووداو 

لە گەورەترین و گرنگترین رێوڕەسمی ساڵانەی رێزلێنان و خەڵاتكردنی باشترین كارە رۆژنامەڤانییەكان لە جیهاندا، مەجید نیزامەدین گلی، وەک پەیامنێری تۆڕی میدیایی رووداو خەڵاتی برۆنزی ریکاردۆ ئۆرتیگای نەتەوەیەکگرتووەکانی پێبەخشرا.

تۆڕی میدیایی رووداو بووە یەكەمین دەزگای میدیایی كە لە كوردستان و عێراقەوە، پەیامنێرێکی لەلایەن نەتەوەیەكگرتووەكانەوە خەڵاتبكرێت.

لە رێوڕەسمەکەدا مێزێکی تایبەت بۆ رووداو داندرابوو، هێمن لهۆنی بەڕێوەبەری دیجیتاڵ میدیای رووداو، رەنج سەنگاوی، پێشکەشکاری بەنێوبانگی کوردستان، نامۆ عەبدوڵڵا بەڕێوەبەری نووسینگەی رووداو لە واشنتن و مەجید نیزامەدین گلی بەڕێوەبەری نووسینگەی رووداو لە نیویۆرک بەشداربوون.