‌دوو كتێبی دیكه‌ی نه‌وشیروان مسته‌فا له‌چاپ ده‌درێن
AM:10:18:04/02/2019

میترۆ، وێستگه‌ نیوز

سەرپەرشتیاری لەچاپدانی کتێبەکانی كۆچكردوو نەوشیروان مستەفا ئاشكرایكرد كه‌ لە دووەم ساڵڕۆژی کۆچی دواییدا و لە درێژەی زنجیرەی کتێبی بەدەم رێگاوە گوڵچنین هەندێک لە کتێبە چاپ نەکراوەکانی رێكخه‌ری پێشووی بزوتنه‌وه‌ی گۆڕان لە چاپ دەدرێن.

بڕیاره‌ دوو کتێبی دیکەی نەوشیروان مستەفا ئەمین، رێكخه‌ری پێشووی بزوتنه‌وه‌ی گۆڕان لە بواری ئەدەبدا چاپ بكرێن کە پێش کۆچی دوایی نوسیویەتی و كتێبه‌كانیش لە دووەم ساڵیادی کۆچی دواییدا بڵاوبکرێتەوە.

مەجید ساڵح، سەرپەرشتیاری لەچاپدانی کتێبەکانی نەوشیروان مستەفا به‌ میدیاكانی بزوتنه‌وه‌ی گۆڕانی راگه‌یاندوه‌: "لە ئەرشیفی کاک نەوشیروان مستەفا کتێبێکی نوێ دۆزراوەتەوە بە ناوی (گه‌شتێ له‌گه‌ڵ سالم) کە قەبارەکەی 250 لاپەڕەیە و بەشەکانی کتێبەکە پێکهاتون لە:
1-  قاڵبه‌ شیعریه‌کانی مه‌دره‌سه‌ی بابان (سالم وه‌ک نمونه)
2-  بابه‌ته‌کانی شیعری سالم - هه‌ندێ لایه‌نی ژیانی کۆمه‌ڵایه‌تی

کتێبێکی دیکەش بەناوی (نەوەی دوەمی قوتابخانەی بابان)، کە تایبەتە بە شاعیران (حاجی قادر کۆیی، وەفایی، حەریق، شێخ رەزای تاڵەبانی) لە ئەرشیفی تایبەتی کاک نەوشیروان و دوای کۆچی دوایی لەناو کۆمپیوتەرەکەیدا دۆزراوەتەوە.

وتیشی :" بڕیارە لە دوەم ساڵڕۆژی کۆچی دواییدا، لە درێژەی زنجیرەی کتێبی بەدەم رێگاوە گوڵچنین هەندێک لە کتێبە چاپ نەکراوەکانی لە چاپ بدرێت"، ئاشكراشیكردوه‌: ئەو کتێبانە تایبەتن بە بواری ئەدەب و لە چوارچێوەی بەرگی سێیەم و چوارەمی کتێبی یەکەمی بەدەم رێگاوە گوڵچنین چاپ دەکرێت.

ساڵی رابردووش لە یەکەم ساڵیادی کۆچیی دواییدا، کتێبێکی دیکەی نەوشیروان مستەفا بەناونیشانی (کورد و کوردستان لە رۆژنامەی تێگەیشتنی راستی و گۆڤاری لغه‌ العرب دا) بڵاوکرایەوە.