ته‌نیا كچە فۆتۆگرافەرەكەی هەڵەبجەی شەهید چ داواکاری و گله‌ییه‌کی هه‌یه‌؟
AM:10:53:05/02/2019






ئاره‌زو فه‌تاح ئه‌و کچه‌ فۆتۆگرافه‌ره‌ی هه‌ڵه‌بجه‌ی شه‌هیده‌ که‌ مێژوویه‌کی جوانی بۆ خۆی و شاره‌که‌ی و وه‌رزشی شاره‌که‌شی نووسیوه‌ته‌وه‌‌.

ستادیۆم بۆ به‌سه‌رکردنه‌وه‌ی ئاره‌زو فه‌تاح دیدارێکی له‌گه‌ڵ ئه‌نجامداو چه‌ند پرسیارێکی لێکردو ئه‌ویش به‌مشیوه‌یه‌ وڵامی پرساره‌کانی داینه‌وە.

*ئاره‌زو فه‌تاح کێیه‌؟

– ناوم ئاره‌زو فه‌تاحه‌، ١٤/٢/١٩٩٨ لەدایک بوم، لە قۆناغی دووه‌می بەشی پەروەردەی وەرزشیم لە زانکۆی هه‌ڵەبجە، هه‌ر له‌منداڵیمه‌وه‌ حەزم لە وێنە گرتن و یاری کردن و وه‌رزش بوە، بەڵام بەھۆی نەبونی کامێرایه‌کی باشه‌وه،‌ نەمتوانیوە وێنە وه‌رزشییه‌کان بگرم، بەڵام لە زۆربەی یاریەکاندا وەکو ھاندەرێک ئاماده‌ ده‌بوم و هه‌میشە ئاواتی ئەوەم دەخواست کە ڕۆژێک بێت بتوانم وەکو فۆتۆگرافەرێک بچمە ناو یاریگاکانەوە.

*که‌ی ئه‌و ئاوته‌ت هاته‌دی؟

-سوپاس بۆ خوا دواجار ئەو خەونەم ھاته‌ دی و ئه‌وه‌ ماوه‌یه‌کی زۆره‌ له‌ یاریگاکان ئاماده‌م و خه‌ریکی ئاره‌زووه‌که‌ی خۆمم.

*به‌کام فۆتۆگرافه‌ر سه‌رسامی؟

-فۆتۆگرافەری بە تواناو لێھاتومان زۆرن، کارەکانیشیان زۆر جوانن بەڵام کاک ئارێز بارتێز وێنەکانی بە لای منەوە زۆر جوان و سەرسامکەرن.

*هیچ یانه‌یه‌ک یان دا‌مه‌زراوه‌یه‌ک داوای ئه‌وه‌ی لێ نه‌کردوی ببیته‌ وێنه‌گری ئه‌وان؟

-نەخێر ، لە ھیچ یانەیەک و دامه‌زراوه‌یه‌که‌وه‌ داوای ئەوەیان لێ نەکردوم کە ئیشیان بۆ بکەم.

*ئه‌ی ئه‌و شوێنانه‌ هیچ پشتگیرییه‌کان له‌م کا‌ره‌دا نه‌کردووی؟

نه‌خێر به‌ هیچ شێوه‌یه‌ک پشتگیریشیان نه‌کردووم، تەنانەت بۆ باجی فۆتۆگرافەری بۆ ئه‌وه‌ی به‌ڕه‌سمی بچمه‌ نێو یاریگاکان زۆر شوێن گەڕام و داوام لە زۆر کەس و لایه‌ن کرد پشتگیریم بکه‌ن، به‌ڵام کەسیان ئامادە نەبوون پشتگیریەکم بۆ بنوسێ.

*داواکاری تۆ چییه‌؟

– پێم باشە گرنگی بە فۆتۆگرافەرە وەرزشییەکانما بدرێ بۆ پێشکەوتنی وەرزش و ئاستی وەرزش لە کوردستان.

*هیواکانی ئاره‌زو فه‌تاح چین؟

له‌ خێزانه‌که‌مدا بە ته‌نیا من حەزو خولیای ناو یاریگاکان و فۆتۆگرافەریم هه‌بووه‌، کە دەموت حەزم لە کاری فۆتۆگرافه‌رییە گاڵتەیان بە قسەکانم دەھات و دەیان وت ئەوە بۆ تۆ نابێت و ناکرێت و ئیشی کچ نییە، بەڵام من هه‌رگیز گوێم به‌و قسانە نەداو ھەمیشە هەوڵی بەدیهێنانی خەونەکەی خۆمم هه‌بوو، خەونی من ئەوەیە ھاوکاریم بکەن و بتوانم وەک کچە فۆتۆگرافەرێکی وەرزشی هه‌موو یاریگاکانی کوردستان بگەرێم و بەردەوام بم لە وێنە گرتن، دەسخۆشیشم هه‌یە بۆستادیۆم بۆ ئه‌م به‌سه‌رکردنه‌وه‌یه‌ و ھیوای سەرکەوتن و بەردەوامیتان بۆ دەخوازم.

كوردستانی‌ نوێ‌