پەخشی 24 كەناڵی ناوخۆیی دەستپێدەكاتەوە
AM:11:29:11/02/2019



میترۆ، SNN
بەشێك لەو كەناڵە ناوخۆییانەی كە لەچەند ڕۆژی ڕابردوودا بەهۆی نەدانی قەرزەكانیان و نوێنەكردنەوەی گرێبەستەكانیان، پەخشەكانیان لەلایەن وەزارەتی رۆشنبیرییەوە ڕاگیرابوو، دەستیان بەپەخش كردۆتەوە، بەرپرسێكی وەزارەتی ڕۆشنبیریش ڕایدەگەیەنێت: دوای تەواوكردنی وەرگرتنی ڕسوماتی نوێكردنەوەی گرێبەستەكانیان، پەخشەكانیان دەستپێدەكەنەوە.

محەمەد گەردی، بەڕێوەبەری گشتیی ڕاگەیاندن و چاپ و بڵاوكردنەوە لەوەزارەتی ڕۆشنبیری، بە SNNی ڕاگەیاند: لەماوەی چەند ڕۆژی ڕابردووداو بەهۆی پابەند نەبوون بەڕێنماییەكان و نوێنەكردنەوەی گرێبەستەكانیان، لەهەولێر 13 كەناڵ و لەسلێمانی شەش كەناڵ و لەدهۆكیش پێنج كەناڵ داخران، بەڵام لەئێستادا زیاتر لەنیوەیان گرێبەستەكانیان نوێكردۆتەوەو دەستیان بەپەخش كردۆتەوە.

بەوتەی ئەو بەرپرسەی وەزارەتی ڕۆشنبیری، نزیكەی 10 كەناڵ ماون بۆئەوەی دەست بەپەخش بكەنەوەو مۆڵەتەكانیان نوێ بكەنەوە، دەشڵێت: "هەركاتێك گرێبەستەكەیان نوێكردەوە، ڕێگەیان پێدەدرێت بەهەمانشێوەی ڕابردوو پەخشەكانیان دەستپێبكەن".

ڕەتیشیدەكاتەوە، ئەو كەناڵانە داخرابن وئاشكرایدەكات، "هیچ بڕێك غەرامە ناكرێن و تەنها پەخشیان ڕاگیرابوو، بەجۆرێك لەجۆرەكانیش رەچاوی كەناڵەكانی ڕاگەیاندن دەكەن و هیچ سزایەكیان نادەن".

سەبارەت بەنرخی گرێبەستەكانیش، محەمەد گەردی وتی:" ئەگەر كەناڵێك بەخشی لەسەرجەم ناوچەكانی هەرێمی كوردستان هەبێت، گرێبەستی ساڵانەی پێنج ملیۆن دینارە، بەڵام ئەگەر پەشخەكەی تەنها لەپارێزگایەك بێت، 250 هەزار دیناری لێوەردەگیرێت".