فۆتۆگرافەرێكی كورد بەشداری لە پێشبڕكێیەكی جیهانیدا دەكات
AM:10:47:01/08/2019


میترۆ، سبەی

فۆتۆگرافەرێكی كوردی دانیشتوی هەڵەبجە بە فۆتۆیەك بەشداری لە پێشبڕكێی ساڵانەی نانشناڵ جیۆگرافیك دەكات.

پێشڕەو مەهدی كە دانیشتوی شاری هەڵەبجەیە، ماوەی زیاتر لە چوار ساڵە كاری فۆتۆگرافی دەكات و لە ئێستادا بە وێنەیەک بەشداری لە پێشبڕکێیەکی جیهانیدا دەکات.

لەلێدوانێكیدا بۆ (سبەی)، پێشڕەو مەهدی باسی لە سەرەتای حەز و خولیای بۆ كارەكەی كرد و رایگەیاند: سەرەتا وەک حەزیک، حەوت ساڵ پێش ئێستا هاتمە نێو بواری فۆتۆگرافی بەو هیوایەی وەک کوردێک ببمە فۆتۆگرافێکی جیهانی و بتوانم لە رێگەی هونەری فۆتۆگرافی خزمەت بە کۆمەڵگەی کوردی بکەم و بۆ بەرەوپێشچونی کارەکانم رۆژانە سەرقاڵی خوێندنەوەم لەو بوارەدا، چونکە كاری فۆتوگرافی یاسا و رێسای خۆی هەیە و تا زیاتر بچیتە نێو بوارەکە، ئاڵۆزتر دەبێت.

ئاماژەی بەوەشكرد كە لەئێستادا سەرقاڵی كارێ‌كی دۆکیومێنتاریم لە سەر سروشت و ئاژەڵی کێوی و (80%)ی كارەكە تەواو بوە و بۆ تەواوکردنیشی پێویستم بە هاوکارییە.

سەبارەت بەو وێنەیەش كە لە پێشبڕكێی ناشناڵ جیۆگرافیگ قبوڵ كراوە، پێشڕەو مەهدی وتی: وێنەكە لە گەورەترین پێشبڕكێی فۆتۆگرافیی فەرمی و جیهانی بەناوی (لحڤات) قبوڵ كراوە و لەلایەن تیمی ناشناڵ جیۆگرافیكەوە ئاگادار كرامەوە.

وتیشی: ئەو پێشبڕكێیە ساڵانە ئەنجام دەدرێت و لە سەرتاسەری دونیاوە فۆتۆگرافەکان تێیدا بەشدار دەبن و لەئێستادا چاوەڕێی ئەنجامی كۆتایی لیژنەی دادوەریی تایبەت بە پێشبڕكێكەم و ئەگەر پلەی یەكەم بەدەستبهێنم ئەوا 
ئەو کامێرایەی کە بەدڵمە دەیکڕم و دۆکۆمێنتاریەکەمی پێ تەواو دەکەم، خەڵاتەکەش بڕی (15) هەزار دۆلاری ئەمەریکییە.

ئەو فۆتۆیەی پێشڕەو مەهدی چركاندویەتی و بەشدارە لە كێبڕكێكە، بریتییە لە وێنەی گۆمی بێكۆدیان لە قەزای چۆمان و تیایدا شوانێك لەگەڵ رانەمەڕێك دەردەكەوێت، بەوتەی پێشڕەو مەهدی، زیاتر لە (10) كاتژمێری بەپێ بەڕێكردوە تا گەیشتوە بە شوێنەكە، وێنەكەش باس لە ژیانی سادەی خەڵكانی دانیشتوی نزیك شاخ و چیاكانی كوردستان دەكات.