رونكردنه‌وه‌یه‌ك له‌ وه‌زیری ناوخۆی حكومه‌تی هه‌رێمی كوردستانه‌وه‌
PM:12:28:07/08/2019


میترۆ، وێستگه‌ نیوز
نوسینگه‌ی وه‌زیری ناوخۆی حكومه‌تی هه‌رێمی كوردستان جه‌ختده‌كاته‌وه‌ كه‌ وه‌زیری ناوخۆ په‌یج و ئه‌كاونتێك و هه‌ژمارێكی ئه‌لیكترۆنیی به‌ناوه‌وه‌ نییه، ئەوانەش ئەو کارە دەکەن رێوشوێنی یاسایی لە دژیان دەگیرێتەبەر.

نوسینگه‌ی رێبه‌ر ئه‌حمه‌د، وه‌زیری ناوخۆی حكومه‌تی هه‌رێمی كوردستان رونكردنه‌وه‌یه‌كی سه‌باره‌ت به‌ كردنه‌وه‌ی چه‌ند په‌یج و ئه‌كاونتێكی ساخته‌ له‌ تۆڕه‌ كۆمه‌ڵایه‌تییه‌كان بڵاوكرده‌وه‌ و رایگه‌یاند كه‌ وه‌زیری ناوخۆ هیچ په‌یج و ئه‌کاونتێکی له‌ تۆڕه‌ کۆمه‌ڵایه‌تیه‌کان نییه‌.
نوسینگه‌كه‌ ئه‌وه‌شی به‌بیرهێناوه‌ته‌وه‌ كه‌ ئه‌گه‌ر هه‌ر بڕیار و بابه‌تێکی فه‌رمی هه‌بێت، راگه‌یاندنی وه‌زاره‌تی ناوخۆ لایه‌نی به‌رپرسه‌ له‌ گه‌یاندنی ئه‌و زانیاری و بڕیارانه‌ به‌ ده‌زگاکانی راگه‌یاندن و رای گشتی.

ده‌قی رونكردنه‌وه‌كه‌:

که‌سانی نابه‌رپرس، به‌ناو و وێنه‌ی به‌ڕێز وه‌زیری ناوخۆی حکوومه‌تی هه‌رێمی کوردستان، په‌یج و ئه‌کاونتی ساخته‌یان له‌ تۆڕه‌ کۆمه‌ڵایه‌تیه‌کان دروست کردووه‌.

به‌ هه‌موو لایه‌کی راده‌گه‌یه‌نین، به‌ڕێز وه‌زیری ناوخۆ، هیچ په‌یج و ئه‌کاونتێکی له‌ تۆڕه‌ کۆمه‌ڵایه‌تیه‌کان نییه‌.

ئه‌گه‌ر هه‌ر بڕیار و بابه‌تێکی فه‌رمیش هه‌بێت، که‌ پێویست بکات رابگه‌یه‌ندرێت، راگه‌یاندنی وه‌زاره‌تی ناوخۆ لایه‌نی به‌رپرسه‌ له‌ گه‌یاندنی ئه‌و زانیاری و بڕیارانه‌ به‌ ده‌زگاکانی راگه‌یاندن و رای گشتی، بۆیه‌ هیوادارین هاوڵاتیان و ده‌زگا راگه‌یاندنه‌کان، پشت به‌ ئه‌کاونت و په‌یجه‌کان نه‌به‌ستن له‌ گواستنه‌وه‌ی هه‌واڵ و زانیارییه‌کانی په‌یوه‌ست به‌ به‌ڕێز جه‌نابی وه‌زیر و وه‌زاره‌تی ناوخۆ.

داواکارین ئه‌و که‌سانه‌ی ئه‌و پێگه‌ کۆمه‌ڵایه‌تیه‌ ساختانه‌یان دروست کردووه‌ و ده‌ست له‌و کارانه‌ هه‌ڵگرن، بە پێچەوانەوە رێککاری یاسایی لەدژیان دەگیرێتەبەر.