نەتەوەیەکگرتوەکان داوای پاراستنی خەڵکی سیڤیل دەکات لە رۆژهەڵاتی فورات
PM:12:48:07/10/2019


میترۆ، خەندان


نەتەوەیەکگرتوەکان داوای کرد خەڵکی سیڤیل لە رۆژهەڵاتی فورات بپارێزرێت لە ئەگەری هێرشی سوپای تورکیا.


بەرپرسێکی باڵای نەتەوە یەکگرتوەکان هۆشداری دا لەئەگەر هێرشی تورکیا بۆسەر باکوری رۆژهەڵاتی سوریا کە رێژەیەکی زۆر لەخەڵک ئاوارە دەبن، داوای لەهەمو لایەک کرد هاوڵاتیانی مەدەنی بپارێزن.


دوای ئەوەی شەوی رابردو دۆناڵد ترەمپ، سەرۆکی ویلایەتە یەکگرتوەکانی ئەمریکا و رەجەب تەیب ئەردۆغان، سەرۆک کۆماری تورکیا پەیوەندی تەلەفۆنیان ئەنجامدا و لەبارەی ناوچەی ئارام لە سوریا گفتوگۆیان کرد، کۆشکی سپی راگەیەندراوێکی بڵاویکردەوە و رایگەیاند، "بەمزوانە تورکیا ئۆپەراسیۆنی سەربازی لە باکوری رۆژهەڵاتی سووریا دەستپێدەکات".


هێزەکانی ویلایەتە یەکگرتوەکانی ئەمریکا بەشداریی لە ئۆپەراسیۆنەکەی تورکیا ناکەن و هاوکاری نابن
کۆشکی سپی لە راگەیەندراوەکەدا ئاماژەی بەوەکردوە، "هێزەکانی ویلایەتە یەکگرتوەکانی ئەمریکا بەشداریی لە ئۆپەراسیۆنەکەی تورکیا ناکەن و هاوکاری نابن، هاوکات بەربەستیش بۆ ئۆپەراسیۆنەکە دروستناکەن".


ئەمریکا خەلافەتی داعشی لە ناوچەکەدا تێکشکاند، بەڵام چیدیکە ئامادەیی لەو ناوچانە نابێت کە ئۆپەراسیۆنەکەی تێدا ئەنجامدەدرێت
ئەوەش خراوەتەڕو، "ئەمریکا خەلافەتی داعشی لە ناوچەکەدا تێکشکاند، بەڵام چیدیکە ئامادەیی لەو ناوچانە نابێت کە ئۆپەراسیۆنەکەی تێدا ئەنجامدەدرێت و هەروەها تورکیاش بەرپرس دەبێت لەو چەکدارە داعشانەی لە ماوەی دو ساڵی رابردو لە ناوچەکە دەستگیرکراون".


سەرۆکایەتی‌ کۆماری‌ تورکیا لە راگەیەندراوێکدا لەبارەی پەیوەندیە تەلەفۆنیەکەی ترەمپ و ئەردۆغان رایگەیاندوە،  ئەردۆغان جەختی لە دروستکردنی ناوچەی ئارام كردوەتەوە وەك هەوڵێك بۆ كەمكردنەوەی "مەترسی‌ تیرۆر" لەسەر وڵاتەكەی.


هاوكات هەردو سەرۆک گفتوگۆ لەسەر رەخساندنی هەلومەرجی گونجاو بۆ گەڕانەوەی پەنابەرانی سوری بۆ زێدی‌ خۆیان كردوە.


هەر بە گوێرەی راگەیەندراوەكە، لەسەر بانگهێشتی ترەمپ، بڕیارە مانگی داهاتو ئەردۆغان بچێتە واشنتن و كۆبونەوەی دوقۆڵی ئەنجامبدەن.