پۆلیسی سلێمانی: رووداوی گیانله‌ ده‌ستدانی ئامانج و لانه‌و منداڵه‌كه‌یان خۆ كوژی بووه‌

میترۆ
پۆلیسی سلێمانی ئه‌نجامی لێكۆڵینه‌وه‌كانی خۆی له‌ باره‌ی هۆكاری گیان له‌ ده‌ستدانی رۆژنامه‌نووسان ئامانج بابانی و لانه‌ محه‌مه‌دی هاوسه‌ری و منداڵه‌كه‌یانی بڵاوكرده‌وه‌ و رایگه‌یاند، "رووداوه‌كه‌ خۆكوژی بووه‌".

له‌ كۆنگره‌یه‌كی رۆژنامه‌وانیدا، ئاسۆ شێخ تەها، بەڕێوەبەری پۆلیسی سلێمانی هۆكاری گیان له‌ ده‌ستدانی ئامانج بابانی و لانه‌ محه‌مه‌د و منداڵه‌كه‌یانی راگه‌یاند و وتی: "بەڵگەی پێویست هەیە کە دەیسەلمێنن رووداوەکە خۆکۆژییە بووە و بە هیچ جۆرێک ئۆتۆمبێلەکە لە دەرەوە فیشەک بەری نەکەوتووە، ئۆتۆمبێلەکە لە دوای رووداوەکە وەرگەڕاوە".

ئاماژەی بەوەشدا، "20/10/2019 دوا دانیشتنی دادگای نێوان ئامانج بابانی و لانە محەمەدی هاوسەری بووە و پێشتر کێشەی ئەو دوو هاوسەرە لە دادگا بووە و چەند دانیشتێکیان لە دادگا هەبووە".

وتیشی، "ئێمە هۆکاری کێشەی نێوان ئامانج بابانی و خێزانەکەی دەزانین، بەڵام ئاشکرای ناکەین و بۆ دادگای جێدەهێڵین".

ئاسۆ شێخ تەها، بەڕێوەبەری پۆلیسی سلێمانی رایگەیاند، "منداڵەکەیان سێ فیشەکی بەرکەوتووە، لانە محەممەدی هاوژینی دوو فیشەک و خۆیشی یەک فیشەکی بەرکەوتووە".

به‌وته‌ی به‌ڕێوه‌به‌ری پۆلیسی پارێزگای سلێمانی "سێ شایه‌تحاڵیان هه‌یه‌ كه‌ له‌به‌رده‌م دادگا وتوویانه‌ كه‌س له‌و ده‌وروبه‌ره‌ ته‌قه‌ی نه‌كردووه‌".

ئاسۆ شێخ ته‌ها راشیگەیاند: "ئامانج بابانی‌ ئۆتۆمبێله‌كه‌ی خۆی له‌به‌رده‌م ماڵی باوكی لانه‌ به‌جێهێشتووه‌ له‌ گه‌ڕه‌كی ئاشتی و به‌ ئۆتۆمبێله‌كه‌ی لانه‌ی هاوسه‌ری كه‌ له‌ جۆری (جیب لاریدۆ) بووه‌ رۆیشتوونه‌ته‌ ده‌ره‌وه‌".