هەڤاڵ ئەبوبەكر: ئەوەی بڵاوكراوەتەوە ئیشی مەلەوانە درۆزنەكانی فەیسبووکە
PM:05:39:21/03/2020
پارێزگاری سلێمانی رەتیدەكاتەوە هاونیشتمانیان لە سنووری پارێزگاکە پابەندی رێنماییەكانی قەدەخەی هاتووچۆ نەبووبن ‌و دەشڵێ "ئەوەی بڵاوكراوەتەوە، ئیشی مەلەوانە درۆزنەكانی فەیسبووکە".
 
هەڤاڵ ئەبوبەكر، پارێزگاری سلێمانی بە تۆڕی میدیایی رووداوی راگەیاند، ئەو وێنانەی شەوی رابردوو لە بەشێك لە تۆڕە كۆمەڵایەتیەكان بڵاوكراونەتەوە گوایە خەڵك دەچن بۆ سەیران و پابەندی رێنماییەكان نابن، دوورە لە راستییەوە.
 
پارێزگاری سلێمانی جەختی لەوە كردەوە، وێنەکان کۆنن و راگرتنی هاتووچۆ لە سنووری پارێزگای سلێمانی زۆر بە باشی و بەڕێوەدەچێت ‌و گوتیشی "هیچ سەركەشی و سەرپێچییەك نییە بۆ سەیرانگە و هاوینەهەوارەكان، سوپاسی خەڵكیش دەكەین، كە پابەندی رێنماییەكانن".
 
وەك نەریتێك ساڵان، لە 21ی ئادار خەڵكی دەچوونە دەرەوە بۆ گەشت و سەیران، بەڵام ئەمساڵ بەهۆی ڤایرۆسی کۆرۆنا و بۆ رێگریکردن لە بڵاوبوونەوەی، لە سەرجەم پارێزگاکانی هەرێمی کوردستان قەدەخەی هاتووچۆ راگەیێندراوە، ئەمەش لەپێناو پاراستنی تەندروستیی هاونیشتمانیان و بەرەنگاربوونەوەی کۆرۆنا.
 
بەپێی ئامارەکانی وەزارەتی تەندروستیی حکومەتی هەرێمی کوردستان، تاوەکو ئێستا لە هەرێمی کوردستان 47 کەس تووشی ڤایرۆسی کۆرۆنا بوون، لەو ژمارەیەش 13 کەس چاکبوونەتەوە و یەک کەسیش گیانی لەدەستداوە.