ده‌زگای دواڕۆژ بۆ رووناكبیری و راگه‌یاندن له‌و رۆژه‌وه‌ كه‌ دروست بووه‌ بۆ ئه‌و مه‌به‌سته‌ هاتووه‌ته‌ مه‌یدان كه‌ ده‌زگایه‌كی بێلایه‌ن و عه‌لمانی و پێشكه‌وتنخواز بێت و به‌ یه‌ك مه‌ودا له‌ هه‌موو حزب و لایه‌نه‌ سیاسییه‌كانی كوردستانه‌وه‌ دوور بێت كه‌ ئه‌مه‌ش كارێكی زه‌حمه‌ته‌ به‌تایبه‌ت له‌ وڵاته‌ دواكه‌وتووه‌كاندا كه‌ زۆرجار ناسنامه‌كان ده‌گۆڕێن و كارته‌كان تێكه‌ڵ ده‌بن له‌ كاتێكدا كه‌ چه‌ندین هه‌ڕه‌شه‌ی سه‌ربازی و ئابووری و كۆمه‌ڵایه‌تی مه‌ترسی گه‌وره‌یان دروستكردووه‌ بۆ ئه‌زموونه‌ پڕ هه‌ڵه‌ و كه‌موكوڕییه‌كه‌ی كورد و تێكڕای كۆمه‌ڵی كورده‌واری له‌ باشووری كوردستاندا.

 

 

هه‌ندێجاریش كه‌ هه‌ڵتۆقین و ته‌نانه‌ت ته‌قینه‌وه‌ی ناكۆكی نێوان پێكهاته‌ سیاسییه‌كانی كوردستان ده‌بنه‌ مه‌ترسی ئه‌وه‌ی ئاسایشی كۆمه‌ڵایه‌تی بشێوێنێت بێده‌نگییه‌كی به‌رپرسیارانه‌ زۆر چاكتره‌ له‌وه‌ی به‌ مه‌رام و بێ مه‌رام له‌ رووی راگه‌یاندنه‌وه‌ رووداوه‌كه‌ گه‌وره‌ بكرێت، چونكه‌ ئه‌زموونی پارته‌ سیاسییه‌كانی عێراق به‌ حزبی شیوعی عێراقیشه‌وه‌ و هه‌روه‌ها ته‌قینه‌وه‌ی ناكۆكییه‌كانی ناو پارتی دیموكراتی كوردستان له‌ شه‌سته‌كانی سه‌ده‌ی رابردوودا هه‌موویان به‌ لاوازبوونی ئه‌و حزبانه‌ كۆتاییان هاتووه‌، دواجاریش بزووتنه‌وه‌ نیشتمانییه‌كان و جه‌ماوه‌ری گه‌ل زه‌ره‌رمه‌ندبوون تیایدا و پاش ماوه‌یه‌ك لایه‌نه‌ لێكترازاوه‌كان كه‌ هه‌ست به‌ ئاكامه‌ خراپه‌كانی جیابوونه‌وه‌كانیان ده‌كه‌ن، هه‌موو هه‌وڵ و توانایه‌كیان ده‌خه‌نه‌ گه‌ڕ بۆ نزیكبوونه‌وه‌ و دروستكردنی هاوپه‌یمانی و بگره‌ سه‌رله‌نوێ یه‌كگرتنه‌وه‌ش وه‌ك له‌ ئه‌زموونه‌كه‌ی بزووتنه‌وه‌ی گۆڕان و یه‌كێتیی نیشتمانیی كوردستاندا بینیمان و ده‌یبینین. بۆیه‌ كه‌سایه‌تییه‌ به‌رپرسیاره‌كان بۆ نموونه‌ جه‌نابی مام جه‌لال پاش ئه‌زموونێكی تاڵ و دژوار له‌و ململانێیانه‌دا په‌یامی چه‌پكه‌گوڵ و پێكه‌وه‌ ژیان و یه‌كتر قبوڵكردنی كرده‌ ستراتیج و به‌چاوی ره‌خنه‌گرانه‌وه‌ ده‌ڕوانێته‌ رووداوه‌ ناخۆشه‌كانی كه‌رتبوون و دڕدۆنگی.

 

ده‌زگای دواڕۆژ بێئاگا نيیه‌ له‌ گیروگرفته‌كان و ته‌نانه‌ت له‌ ململانێى ناوخۆی حزبه‌ كوردستانییه‌كانیش، به‌م رووداوه‌ی رۆژی 1ی ئه‌یلولیشه‌وه‌ له‌ناو سه‌ركردایه‌تی یه‌كێتیی نیشتمانیی كوردستان و راگه‌یاندنی ره‌وتی (ناوه‌ندی بڕیار). هه‌رچه‌نده‌ ئه‌وه‌ مه‌سه‌له‌یه‌كه‌ به‌ روواڵه‌ت په‌یوه‌ندی ته‌نیا به‌ ژیانی ناوخۆی یه‌كێتیی نیشتمانیی كوردستانه‌وه‌ هه‌یه‌، به‌ڵام راسته‌وخۆ و ناڕاسته‌وخۆ كارده‌كاته‌ سه‌ر تێكڕای پڕۆسه‌ی سیاسی و سه‌ر ژیانی جه‌ماوه‌ر له‌كاتێكدا كه‌ قه‌یرانی دارایی و حوكمڕانی و هه‌ڕه‌شه‌ی تیرۆریسته‌كانی داعش ئاسۆیه‌كی تاریك له‌ كوردستاندا وێنا ده‌كه‌ن.  

بۆیه‌ هه‌ڵوێستی راست و دروست به‌لای دواڕۆژه‌وه‌ بواردانه‌ به‌ خاوكردنه‌وه‌ی گرژییه‌كان و هه‌وڵی دڵسۆزانه‌یه‌ بۆ نزیككردنه‌وه‌ی بیر و بۆچوونه‌كان له‌ رێگه‌ كۆمه‌ڵایه‌تییه‌كان و شێوازه‌كانی دیكه‌ی سه‌لماندنی خه‌مخۆرییه‌وه‌ به‌تایبه‌ت كه‌ هێشتا ته‌واوی جه‌مسه‌ری مه‌سه‌له‌كان و ورده‌كاریی هۆكاره‌كان و هه‌ڵوێستی لایه‌نی به‌رامبه‌ر ئاشكرانه‌كراون و پێمانوایه‌ باشترین رێگه‌ بۆ چاره‌سه‌ری بنه‌ڕه‌تی كێشه‌كانی یه‌كێتیی نیشتمانیی كوردستان به‌ستنی كۆنگره‌یه‌كی گشتییه‌ له‌سه‌ر بنه‌ما دیموكراسییه‌كان و ئه‌و شێوازه‌ی حزبه‌ پێشكه‌وتنخوازه‌كانی جیهان جێبه‌جێی ده‌كه‌ن.