ئەمڕۆ ئاوێنە خەڵات كرا، چونكە لەماوەی یەك ساڵی رابردودا، لەنێو هەمو میدیا نوسراوو بینراوو بیستراوو ئەلكترۆنییەكانی هەرێمی كوردستاندا، زۆرترین كاری لەسەر دۆسیەی گەندەڵی‌و پێشێلكردنی یاسا كردوە، بەپێی پڕۆژەیەك كە لەلایەن رێكخراوی ستۆپ بۆ دژە گەندەڵی بەهاوكاری رێكخراوی NEDی ئەمەریكی ئامادەكراوە.

ئەمە جێی خۆشحاڵی‌و شانازییە بۆ ئاوێنە، كە هەر لەسەرەتای دامەزراندنیەوە تا ئێستا ئامانجێكی سەرەكی گەیاندنی زانیاری بوە. بەسەرنجدان لەوەی لەدنیای ئەمڕۆدا "زانیاریی” یەكێكە لەسەرچاوەكانی دەسەڵات، بۆیە بەردەوام دەسەڵاتدارانی هەرێم ویستویانە زانیارییەكان لەلای خۆیان بشارنەوەو وەك هەمو سەرچاوەكانی دیكەی دەسەڵات لەگەڵ خەڵكیدا بەشی نەكەن.

كوردستان لەڕیزی هەرە پێشەوەی وڵاتانی پڕ گەندەڵكاریی جیهانە، ئەوەی لەبارەی گەندەڵییەوە بڵاودەكرێتەوە، رێژەیەكی زۆر زۆر كەمیی گەندەڵییە لەم هەرێمەی ئێمەدا، هەرێمێك كە بوە بە بەهەشتی چەتەكان، پڕە لەسیاسەتمەداری قۆڵبڕ‌و درۆزن، پڕە لەمافیا‌و سەرمایەداری ساختە، پڕە لەمەلا‌و رۆژنامەنوس‌و رۆشنبیری قوڕمیشكراو، پڕە لەتاوانی رێكخراوو سەروەت‌و سامانی گشتی بەتاڵان دەبرێ‌ بەبێ‌ ئەوەی هیچ لێپرسینەوەو سزادانێك هەبێت. ئیتر چۆن هەمو ئەوانەی لەم گەندەڵییانە سودمەندبون شەڕ لەسەر مانەوەی "وەزعی مەوجود” ناكەن؟ ئاخر چی لەدەسەڵات خۆشترە لەوڵاتێكدا كە چاودێریی‌و لێپرسینەوەی لەسەر نەبێت؟!

زۆرجار ئەو پرسیارە لەئاوێنە دەكرێت، میدیای ئەهلی توانی چی بكا‌و كێ‌ گوێتان لێدەگرێت؟! دیارە خاوەنی ئەم پرسیارانە، تێناگەن قەبارەی گەندەڵی‌و پێشێلكردنی یاسا لەم هەرێمەدا چەند گەورەیە. ئاوێنە لەسایەی ئەم وێرانیی بەهای ئەخلاقی‌و تاڵان‌و بڕۆو پێشێلكاریانەی یاسادا، رەنگە تەنها بەقەد گسك بەدەستەكەی هێرۆشیمای پێبكرێت.

كە ئەمەریكا یەكەمین بۆمبای ئەتۆمی نا بەهێرشیماوە، زۆر دەگمەن بون ژمارەی ئەو كەسانەی گیانیان لەو كارەساتە بەساغی دەربازكرد، تاك تاكێك لەم ژێرزەمین یان لەو داروپەردوی بینا روخاوەی شاردا دەهاتنەدەر‌و دەحەپەسان لەوەی بەسەر شارەكەیان هاتبو، یەكێك لەرزگاربوانی نێو داروپەردوی بینایەك، كە پێشتر كارگوزاریی تیا دەكرد، دوای گەیشتنە دەرگای دەرەوە، سەیری كرد هێشتا شتێك لەجێی خۆی ماوە، كە ئەویش گسكەكەی بو، ئەو به‌شێوه‌یه‌کی میکانیکی گسكەی لەسەر عەردەكە هەڵگرتەوەو لەنێو ئەو وێرانە گەورەیەدا كەوتە گسكدان‌و پاككردنەوە.

لەم كاتەدا رزگاربویەكی تر كە باوەڕی بەوە نەدەكرد چاوی دەیبینێ‌، بەرەو روی هات‌و هاواری لێكرد "خەریكی چیت؟ بەتەمای بەو گسكە بچوكەوە شەڕ لەگەڵ ئەم هەمو وێرانییە بكەیت؟”

وەڵامی كابرا ئەوە بو "جگە لەمە هیچی تم له‌ده‌ستنایه‌و هیچی تر نازانم، بۆ سەرلەنوێ‌ بنیاتنانەوەی وێرانییەكان پێویستە لەشوێنێكەوە دەستپێبكەین”.

ئێمەش له‌نێو دارو په‌ردوی ئه‌م هه‌مو گه‌نده‌ڵییه‌دا وەك ئەو رزگاربوەی تەقینەوە ئەتۆمییەكەی هێر‌وشیماین، جگە لەنوسین‌و قسەكردن دەربارەی پێشێلكاریی یاسا‌و پێشێلكاریی ئازادیی‌و ئەو نایەكسانی‌و نادادپەروەرییە گەورەیەی ئەمڕۆ لەم وڵاتەدا رودەدات، كارێكی دیكە نازانین. هەرچەندە بەسەرنجدان لەم واقیعە تاڵە كە باش دەزانین بۆ روبەڕوبونەوە لەگەڵ ئەم هەمو وێرانییەدا، قەڵەمەكەمان لەگسكی ئەو رزگاربوە هێرۆشیماییە زیاتری پێناكرێت، بەڵام بونمان پێویست‌و گرنگە، باوەڕی تەواویشمان بەوەیە كە دەبێت كوردستان لەسەر بنەمای دیموكراسی‌و ئازادی‌و شەفافیەت‌و دادپەروەری‌و یەكسانی سەرلەنوی بنیاتبنرێتەوە.