كاترین هەكیم كتێبی "سەرمایەی ئیرۆتیكی" وەك رێبەڕێك بۆ بەگەڕخستنی جەستەی ژنان دەنوسێت، كە تێیدا رێنوێنی ژنان دەكات باشتر و زەقتر سود لە "سەرمایەی ئیرۆتیكی" خۆیان وەربگرن و بەكاریبهێنن بۆ بەدەستهێنانی دەرفەتی باشتری كار و بەرزبونەوەی پلەی كۆمەڵایەتی و ... هتد.
ئەو مەبەستی لە "سەرمایەی ئیرۆتیكی" خستنەڕو و نمایشكردنی جەستەیە بە وروژێنەرترین شێوە بۆ سەرنجڕاكێشانی ئەوانی تر... ئەم كارە دەرهاویشتەی لۆژیكی سەرمایەداریی جیهانی هاوچەرخە كە لەسەر یەك بنەما كار دەكات؛ قازانجكردن بەبێ لەبەرچاوگرتنی هیچ شتێك.
هیچ كوشتنێك بە ئەندازەی كوشتنی شتێك لە رێگەی خودی ئەو شتەوە كاریگەر نییە، لەبەرئەوەی هەرگیز پێی نازانێت كە خەریكە خۆی دەكوژێت. روانگەی كاترین هەكیم بۆ ژن كە تەبایە لەگەڵ سەرمایەداری، كوشتنی هەموو ئەگەر و ئیمكانە داهێنەرەكانی ژنە لە رێگەی خودی جەستەی ژنەوە و هاوكات ملكەچكردنی تەواوەتی ژنە لەبەرانبەر پیاو و سیستەمدا. لەلای خۆمان لە هەرێمی كوردستان ئەم كوشتنی ژنە بە جۆرێكی تر لە پانتایی میدیا و فەزای مەجازیدا رەنگی داوەتەوە.
یەكێك لە "دەستكەوت"ـە دیارەكانی پرۆسەی پەڕینەوەی میدیا لە فۆرمی تەقلیدییەوە بۆ فۆرمە مۆدێرنەكەی، بریتییە لەبەدەستهێنانی پانتایی و فەزایەكی فراوانتر. ئێستا سۆشیال میدیا و میدیای نوێ لە فەزایەكی بێئەندازە فراواندا ئیش دەكەن، ئەوان دەستیان بە هەموو كونجەكانی دنیا دەگات، دەستیش بۆ هەموو كونجەكان دەبەن.
ئەگەر هاوڕابین لەسەر كاریگەریی نەرێنی میدیا لەسەر كۆمەڵگە، ئەوە بەپێی هاوكێشەیەكی سادەی ماتماتیكی، دەتوانین بڵێین تاكو روبەری ئیشكردنی میدیا فراوانتر بێت، كاریگەرییە نەرێنییەكانیشی زیاتر دەبن. یەكێك لە كاریگەرییە نەرێنییەكانی میدیای ئەمڕۆش بریتییە لە بەرهەمهێنانەوەی توندوتیژی دژی ژنان. كەواتە لەگەڵ زیادبوونی روبەری ئیشكردنی میدیادا، توندوتیژیش بەشێوەیەكی فراوانتر بەرهەم دەهێنرێتەوە. ئەم دووانە لەپەیوەندییەكی راستەوانەدان.
ئەگەر تۆڕە كۆمەڵایەتییەكان دیارترین دەركەوتەی میدیای نوێ و فراوانترینیان بێت، ئەوا زوتر و رونتر هەست بە كوشتنی مەجازییانەی ژن دەكەین تیایدا كە لێكەوتەی واقیعی لێدەكەوێتەوە. میدیای نوێ هاوشان لەگەڵ سیستەمی سەرمایەداریدا پەرە بە كاڵاكردنی ژن دەدەن لەپێناو قازانجی زیاتر و كەڵەكەكردنی سەرمایەدا. بۆیە بەهیچ جۆرێك رەوشی ژن و تایبەتمەندییەكانی ژن لەبەرچاو ناگرێت.
ئەگەر زۆر دورنەكەوینەوە، هەڵوەستەیەك دەكەین لەسەر پێشبڕكێی سایتە كوردییەكان بۆ بەدەستهێنانی زۆرترین خوێنەر. "زۆرترین خوێنەر" لە فەرهەنگی ئێستای میدیای كوردیدا مانای "زۆرترین پارە"ی هەیە. كۆمپانیاكان لەسەر بنەمای "زۆرترین خوێنەر" ریكلام بە سایتەكان دەدەن. سایتەكانیش دەبێ كەڵكەڵەی ئەوە بچێتە سەریانەوە كە چۆن و بە چی شێوازێك ئەو "زۆرترین خوێنەر"ـە لەماوەیەكی كورتدا لەخۆیان كۆبكەنەوە. هەموو رێگاكانی بەدەستهێنانی "زۆرترین خوێنەر"یش دەچنەوە سەر ئیشكردن لەسەر جەستەی ژن وەك سەرمایەیەكی ئیرۆتیكی بۆ راكێشانی سەرنجی جنسی سەركوتكراوی زۆرترین بەكاربەری فەزای مەجازی كە دواجار بەكاڵاكردنی ژن و بەرخۆركردنی نەخۆشانەی پیاو كۆتایی دێت. خێر و بێری ئەم پرۆسەیە بۆ كێیە؟ بۆ ژنی بەكاڵابووە، یان پیاوی نەخۆشخراوی بەرخۆر؟ بێگومان بۆ هیچیان. خێروبێری دەبێتە قازانج بۆ سەرمایەداران.
سایتە كوردییەكان ئیشكردنیان بووە بە دوو بەشەوە، بەشێكیان كار لەسەر بڵاوكردنەوەی هەواڵی رۆژانەی ئاسایی دەكەن، بەشەكەی دیكەشیان تەرخانكردووە بۆ كۆكردنەوەی خوێنەر. ئەوان لەرێگەی ئەم بەشەوە راوی خوێنەر دەكەن و ژنیش وەك باشترین ئامراز بەكاردەهێنن "فڵان هونەرمەندی ژن لەژووری نوستنەكەی ببینە.. بزانە ماچی كێ دەكات؟.. بزانە لەباوەشی كێدایە؟.. وروژێنەرترین وێنە.. گەورەترین سمت..".. هەموو ئەم دەربڕینانە و هاوشێوەكانیان بەكاربردنی "سەرمایەی ئیرۆتیكی" جەستەی ژنانە كە بە چەوساندنەوەی ژنان كۆتایی دێت.
ئەم ئیشكردنەی میدیا لە پرۆسەیەكی دیالەكتیكیدایە لەگەڵ هۆشیاریی كۆمەڵگەدا، هەروەها پەیوەستییەكی تەواویشی بە سیستەمەوە هەیە. هەم میدیا كلتورێكی دژە ژن لەناو كۆمەڵگەدا دەچەسپێنێت و هەم كۆمەڵگەش جارێكی دیكە دەبێتەوە بە بەرهەمهێنەرەوەی ئەو كلتورە و كادر و بكەری تری بۆ پەروەردە دەكات. هەربۆیە رەخنەكردنی ئەم شێوازە لە ئیشكردنی میدیا ناگاتە مەبەست، تاكو نەبەسترێتەوە بە سیستەمەوە. هەڵەیە گەر پێمانوابێت بە ئامۆژگاریكردنی موحەریرەكان كۆتایی بە كوشتنی مەجازییانەی ژن دەهێنین، بنەڕەتی كێشەكە خۆی لە باڵادەستیی «پارە»دا دەبینێتەوە، پەیوەندییەكی ئەوتۆی بە موحەریرەكانەوە نییە (بەدڵنیاییەوە زۆرێك لەو موحەریرانە ژنن).
میدیا ئێستا بۆتە بكوژێكی پیشەگەری ژن، "پیشەگەر" بەو مانایەی هەر میدیایەك بەشێكی تایبەت و رۆژنامەنوسی تایبەتی بۆ "راوكردنی خوێنەر" داناوە، كاریگەرترین ئامرازیش بەدەستیەوە جەستەی ژن-ە وەك سەرمایەی ئیرۆتیكی. دیارە "سەرمایەی ئیرۆتیكی" جگەلەوەی دەستەواژەیەكی تەواو سەرمایەدارانە و نەخۆشانەیە، ئەوا بەكاڵاكردنی دوا سنورە شەخسییەكانی جەستەی مرۆڤە و لە مرۆڤ خستنی مرۆڤە.
میدیا هێندە پیشەگەرانە دەستی داوەتە ئیشەكە، ئەوانەی كارەكە دەكەن بەهیچ شێوەیەك هۆشیاریی ئەوەیان نییە كە خەریكی چین و چی بەرهەمدەهێنن، بە قەولی ماركس "نازانن چی دەكەن، بەڵام هەر دەشیكەن".
وێستگه نیوز