ئەمڕۆ هەواڵێكم بیست، راستی هەواڵەكە توشی شۆكریكردم، هەم لەبەر ئەوەی چاوەواننەكراوبوو، هەم لەبەرئەوەی هەردوو لا دۆستمن، بەڵام كە هاتە سەر بەرگیركردن لە مافی مرۆڤەكان، دۆستایەتییەكە فەرامۆشدەكەم و بەرگری لە مافخوراو دەكەم،(بەم جۆرە خۆمم فێركردوە.) لێدان لە هەركەسێك، لەسەر قسەكردن، لەسەر نووسین، یان تەنانەت (جنێو)یش، هەر ناوێكی لێبنێین بەشێكە لەو كلتوورە ناتەندروستەی نزیكەی پەنجاساڵە مرۆڤی كورد گیرۆدەی بووە.
ئەگەر ئەو كەسە رۆژنامەنووسبێت و شێوازەكەشی رەق بێت، ناكاتە ئەوەی رێگای پێچەوانە لەگەڵی تاقیبكرێتەوە. لێدان لە كاكە(سەباح) بۆخۆی لێدانە لەو فیكرەیەی كاك (نەوشیروان) لەناو بزوتنەوەی گۆڕاندا بناغەكەی دانا. بزوتنەوەی گۆڕان هێزێكە بۆ بەرگریكردن لە ماف و داخوازی هاوڵاتییان بەهەموو رەنگە جیاوازەكانەوە، ئەم هێزە بناغەی گوتارەكەی لەسەر ئەم بەرگیركردنە بونیادنراوە، لەكاتێكدا هەندێك دۆستی من، پەلاماری دۆستێكی ترم دەدەن، ئیدی لەشوێنی خۆمەوە سەرلەنوێ بیردەكەمەوە ئەمە بۆچی وایە؟ ئەشێت هەڵەتێگەیشتنێك لە خودی تێگەیشتن لە چەمكی گۆڕان هەبێت، یان دووبارەكردنەوەی كلتوورە كۆنەكە سەری هەڵدابێتەوە. بۆئەوەی زیاتر روناكییەك بخەمە سەر دیوە شاراوەكە، سێ چیرۆكی بچكۆلە لەسەر خودی كاك(نەوشیروان) دەگێرمەوە، بۆ تێگەیشتن لە چەمكی گۆڕان و تێگەیشتن لە بیركردنەوەكانی كاك (نەوشیروان).
یانی لەبری بەكارهێنانی مشتەكۆڵە و دووبارەكردنەوەی كلتووری نادروست، تێگەیشتن شوێنی بگرێتەوە. پاشان ببێتە هاوكارێك بۆ ئەو دۆستانە تا زیاتر تێبگەن كاك (نەوشیروان) لەگەڵ نووسەران چۆنبوو، بۆچی دوای خۆی پێچەوانەكەی رووبدات.
یەكەم: كاتی خۆی كە چەندجارێك لەلایەن كۆمەڵێك كەسی حیزبییەوە پەلاماری منیاندا، ئیدی پەلامارەكان هێندە زۆربوون، رۆیشتمەوە بۆ گوند دانیشتم بۆخۆم خەریكی خوێندنەوەبووم و خۆشم لەو هەموو پەلامارە بپارێزم. رۆژێك كاك (قادری حاجی عەلی) تەلەفۆنیكرد و وتی: كاك (نەوشیروان) داواتدەكات و وەرە بۆ ئێرە. منیش رۆیشتم و لە ژوورەكەی خۆی بینیم. هەواڵی پرسیم: وتم باشم! راستی دەیزانی باش نیم، وتی دەزانم باش نیت و هەر خەریكن پەلامارت دەدەن، لە كاتی قسەكاندا وتی: شێر گیانەوەرێكی بێ عەقڵە، بەس چەمۆڵە و ددانی هەیە بۆ ئەوەی خۆی بسەپێنێت، بتەوێت تەنها بە عەقڵ شەڕلەگەڵ ئەم گیانەوەرە بێعەقڵە بكەیت، سەركەوتنی تیانابێت، پێویستە لەپاڵ عەقڵدا هێزیشت هەبێت. تۆ نە لەشكرت هەیە، نە عەشیرەت، بەس قەڵەمێكت هەیە و ئەمانە بۆتۆ ئازان، وەرە تەنیشت من دانیشە بزانین لەمەولا چۆنەبێت. بردمیە لای خۆی، لەو ماڵەی ئێستا كوڕەكانی خۆی تێیدا دەژین، ژورێكی پێدام و پاشان وتیشی مانگانە خەرجیشت دەدەمێ بۆ ئەوەی پێویستت بەكەس نەبێت، بەو مەرجەی خۆت چۆنی هەروابە و لەهیچ شتێكی منیش بێدەنگ مەبە. كاك (نەوشیروان) ئاوابوو بۆ نووسەران!
دووهەم:هاوینبوو، تازە فەرهەنگە هەورامییەكە دەرچووبوو، رۆژێك لە چیمەنەكە بینم، بانیگركردم، وتی: وشەی (تەحەددا) وشە كوردییەكەیم دۆزیوەتەوە لەناو ئەو فەرهەنگەدا هەیە، یانی وشەی (ئاڵنگاری) كورتوپوخت مانای (تەحەددا)یە بەركاری بهێننە و بەهاورێكیانیشت بڵێ بەكاری بهێنن. ئەوكات مۆدێلی هێرشكردنبوو بۆ سەر كاك(نەوشیروان) منیش پێموت حەزەكەی وتارەكە زۆر بخوێنرێتەوە، وتی: زۆر بۆ ئەوەی ئەو وشەیە بچێتە ناو زمانی كوردی، وتم: كەوایە ئەبێت وتارێكی رەخنەیی لەسەر خۆت بنووسم، چونكە ئێستا نووسین لەسەر تۆ زۆر دەخوێنرێتەوە. ئەویش وتی جا لەمە باشتر چی... برۆ وابكە. منیش یەك وتاری رەخنەیەم لەسەر نووسی لە رۆژنامەی ئاوێنە بڵاوكرایەوە، لە ئەرشیفدا ماوە، تەنها لەبەر ئەوەی وشەی (ئاڵنگاری) بچێتە ناو نووسینی رۆژنامەوانییەوە. گۆرانخوازەكان زۆر پێیانناخۆشبوو من وتاری رەخنەیم لەسەر كاك (نەوشیروان) نووسیووە، نەیاندەزانی ئەو خۆی لەبەرخاتری وشەیەك حەزیكرد وتارێكی رەخنەیی لەسەر بنووسم. پاشان خۆشی لە كۆتا وتاریدا ئەو وشەیەی بەباشی بەكار هێناو بەباشی وشەكە رۆشتە ناو زمانی كوردییەوە.
كاك (نەوشیروان) ئاوا بیریدەكردەوە لەگەڵ نووسین و رەخنەدا. یانی چی ئێستا دەبێت لەبەر بەرگریكردن لە ئەو، پەلاماری كەسێك بدرێت كە مرۆڤ ناتوانێت پەلاماری بدات. پەلاماردانی بێدەستووپێییەك ئازاردانی خودی ئەو بیركردنەوانەیە من لێرەدا باسیاندەكەم.
سێهەم: باش بیرمە لەماڵی خۆیان نانمان دەخوارد، كتوپڕ لەكاتی نانخواردنەكەدا وتی: هەستەكەم ترساویت! منیش پێم سەیربوو وای پێوتم، ئینكاریمكرد لەوەی هیچ ترسێكم نییە. لە وەڵامدا وتی: گەر نەترساویت بۆچی ماوەیەكە هیچ لەسەر بزوتنەوەی گۆڕان و من نانووسی؟ یانی هێزێكی گەورەی وەك گۆڕان كێشەی نییە تا لەسەری بنووسی؟ یانی من كە لەناو ئەم كایەی سیاسییەدام ئەم ماوەیە هیچێكم نەكردوە شایەنی رەخنەگرتن بێت؟ یانی هەموو شتەكانمان راستن؟ برواناكەم وابێت و پێویستە بنووسی و هەرشتێك بە پێی بیركردنەوەی خۆت بە هەڵەی دەزانی، بێدەنگ مەبە لێی. بەردەوام رەخنەبگرن بۆئەوەی دەنگی رەخنە كپ نەبێتەوە.
ئەم سێ نمونەیەم بۆیە باسكرد، بۆئەوەی بڵێم: بەرگریكردن لە كاك(نەوشیروان) بەرگیكردنە لە جیاوازییەكان، بەرگریكردنە لە رەخنە و نووسین. بۆم گرنگ نییە ئەو دۆستانە لێم برەنجێن كاتێك دەبینن من بەرگری لە كاك (سەباح) دەكەم. (گەرچی نەشێوازەكەی، نە زمانەكەی، كاك سەباحم قبوڵ نییە، ئەما هەرگیز ناكاتە ئەوەی پەلاماربدرێت.) بۆئەوەی بەرگریی لە چەمكی گۆڕان و بیركردنەوەكانی كاك(نەوشیروان) بكەیت، پێویستە هەموو رەنگێك وەك خۆی قبوڵبكەی. پێویستە تێبگەیت لەوەی كاك (نەوشیروان) خۆی بەرگریكارێكی سەختی رەخنە و جیاوازییەكان بوو، ئەو ماوەیەی جاربەجار لێیەوە نزیك ئەبووینەوە تێیدەگەیاندین، بناغەی بزوتنەوەی گۆڕان بۆ بەرگرییە لە ماف و داخوازی و جیاوازییەكانە، نەك بۆ سڕینەوە و وێرانكردنی دەنگە جیاوازەكان. بۆیە زۆر بەروونی بەو دۆستانە دەڵێم: ئاوا بەرگری لە كاك (نەوشیروان) ناكرێت، گەر دەتانەوێت بەرگری لێبكەن، لانیكەم رێزی ئەو كلتوورە بگرن بەنووسین و بە كردەوە جێیهێشتووە، نەك بەشێوازی گواستنەوەی كلتووری پەلاماردان.