لەگەڵ بەرەوپێشچوون و پەرەسەندنی زیاتری زیرەکیی دەستکرد، بە تایبەت ماڵپەڕەکانی تایبەت بە گفتوگۆکردن (چات) لەگەڵ زیرەکیی دەستکرد، تا دێت بەکارهێنەران زیاتر بۆ مەبەستە جیاوازەکان بەکاری دەهێنن. یەكێک لە بەکارهێنانەکانی چاتەکانی زیرەکیی دەستکرد بۆ راوێژی دەرونییە، ئەوەش دەروونناسانی نیگەران کردووە و پێیانوایە کە زیرەکیی دەستکرد جێگەیانی گرتووەتەوە.

مایتڵ ئایاڵ، نوسەر و دەرونناس، لە راپۆرتێکیدا کە لە پێگەی تایم-ی ئەمەریکی بڵاویکردووەتەوە دەڵێت: "من دەروونناسم و زیرەکیی دەستکرد جێگەی منی گرتووەتەوە". نیشانەکانی زاڵبوونی زیرەکیی دەستکرد بۆ مەبەستی راوێژی دەروونی لە هەموو شوێنێکە. دەروونناسەکە دەڵێت: "سەردانیکەرێکم نیشانیدام کە چۆن چات جی پی تی (ChatGPT) یارمەتیداوە بۆ تێگەیشتن لە پەیوەندییەکانی لەگەڵ دایبابیدا".

جگە لەوەش رۆژانە لە تۆڕە کۆمەڵایەتییەکان دەیبینین کە چۆن بەکارهێنەران گفتوگۆکانی خۆیان لەگەڵ زیرەکیی دەستکرد بڵاودەکەنەوە. یەکێک لە بەکارهێنەران لە بڵاوکراوەیەکدا سەبارەت بە چاتەکانی زیرەکیی دەستکرد دەڵێت: "زۆر باشتر لە هەر مرۆڤێک قسەم لەگەڵ دەکات"، یەکێکی دیکە دەڵێت: "دوای مردنی داپیرم، بە چات جی پی تیم وتت کە شتێکم پێبڵیت بۆ ئەوەی هانم بدات بەسەر خەمەکانمدا زاڵبم، وەڵامەکەی هێندە کاریگەر بوو دەستم بە گریان کرد".

دەرووناسەکە نوسیویەتی، "درۆ دەکەم ئەگەر بڵێم ئەمە وای لێنەکردم ترسم هەبێت"، دەشڵێت، "من کارەکەمم خۆشدەوێت و نامەوێت زیرەکیی دەستکرد جێگەم بگیرێتەوە". رەنگە زیرەکیی دەستکرد یارمەتیدەر بێت بۆ چارەسەرکردنی بەشێک لە کێشە دەرونییە ئاسانەکان، بەڵام بۆ کێشە قورسە دەروونییەکان دەبێت سەردانی کەسانی پسپۆڕ بکرێت. پشتبەستنی تەواو بە زیرەکیی دەستکرد دەبێتە هۆی دروستبوونی قەیرانی پەیوەندی لە نێوان مرۆڤەکاندا.

هۆکاری پشت بەستن بە زیرەکیی دەستکرد رەنگە هەمەجۆر بێت، بەڵام وەکو پسپۆڕە دەرونییەکە باسی لێوە دەکات، راوێژکاریی دەروونی خراپ زۆر بووە، هەروەها دۆزینەوەی راوێژکاری باش قورس بووە، جگە لە زۆری نرخ و کەمی کات. بۆیە راوێژکاری زیرەکیی دەستکرد توانیویەتی ئەو بۆشاییە پڕبکاتەوە.

وەک لە راپۆرتەکەدا هاتووە، نیوەی کەسانی پێگەیشتوو لە ویلایەتەیەکگرتووەکانی ئەمەریکا کە شێواوی دەروونیان هەبووە چارەسەری پێویستیان وەرنەگرتووە، بەڵام لەگەڵ بەکارهێنانی زیرەکیی دەستکرد بەکارهێنەران کە شێواوی دەروونیان هەیە بە ئاسانی دەتوانن راوێژ وەربگرن، ئەوەش شۆڕشە.

مایتڵ ئایاڵ پێشبینی دەکات لە داهاتوویەکی نزیکدا، چارەسەری زیرەکیی دەستکرد بتوانێت مۆدێلی تاکەکەسی فرۆید بۆ چارەسەری دەروونی بەرەو دوورترین ئاست ببات. ململانێ سۆزدارییەکان چیتر تەنیا بە شێوەیەکی تایبەت لەگەڵ کەسێکی دیکەدا مامەڵەیان لەگەڵدا ناکرێت، بەڵکو لەوانەیە بەبێ هیچ پەیوەندییەکی مرۆیی کاریان لەسەر بکرێت و بەکارهێنەران سودی لێ وەربگرن.

لایەنێکی دیکەی ئەرێنی راویژکاری دەروونی زیرەکیی دەستکرد ئەوەیە کە هەموو کات بەردەستە، پێویستی بە سەردانیکردن، نۆرەگرتن و خەرجکردنی پارە نییە، هەروەها دەتوانین هەرچەند بتەوێت قسەی لەگەڵ بکەی، بەپێچەوانەی راوێژکاری دەروونی کە کاتێکی دیاریکراوت هەیە.

پسپۆڕە دەرونییەکە نوسیویەتی لەگەڵ زیرەکی دەستکرد، بەکارهێنەران هەست بە ئازادی زیاتر دەکەن و دەتوانن بە ئازادی ئەوەی لە خەیاڵیاندایە بیڵین، بەبێ ئەوەی بەکارهێنەرەکە هەست بکات لەگەڵ مرۆڤێکی دیکەدا قسە دەکات. هەر وەک یەکێک لە توێژینەوەکانی ساڵی 2024 دەریخستووە، بەکارهێنەران لە گفتوگۆکردنی چاتبووتەکاندا کەمتر هەستیان بە ترس کردووە کە لەلایەن چاتبووکانەوە بڕیاریان لەسەر بدرێت. 

سەرەڕای هەموو خاڵە ئەرێنییەکانی بەکارهێنانی زیرەکیی دەستکرد وەکو راوێژکاری دەروونی، بەڵام مایتڵ ئایاڵ پێیوایە زیادبوونی بەکارهێنانی زیرەکی دەستکرد وەکو راوێژکاری دەروونی، تەنها لەسەر ئەوە نییە کە راوێژکارانی دەروونی لەلایەن زیرەکیی دەستکردەوە جێگایان دەگیرێتەوە، بەڵکو دەربارەی شتێکی گەورەترە، چۆن کۆمەڵگە هەڵیدەبژێرێت کە پەیوەندی لەگەڵ یەکتر بکەن. مایتڵ نوسیویەتی: "بە پەرەپێدانی راوێژکردنی دەروونی بە زیرەکیی دەستکرد، ئێمە تەنها پێویستیمان بە راوێژکارانی دەروونی لە دەست نادەین، بەڵکو توانای قبوڵکردنی هەڵەکانی یەکدیشمان نامێنێت".

سەرچاوە/ سبەی