ئەنجوومەنی نوێنەرانی عێراق هاوڕەگەخوازی و گۆڕینی رەگەز و گۆڕینەوەی هاوسەرەکان بە یاسا قەدەغەدەکات و و ئەمریکا و رێکخراوی لێبوردنی نێودەوڵەتیش نیگەرانی دەردەبڕن.
رۆژی 27ی نیسانی 2024، ئەنجوومەنی نوێنەرانی عێراق یاسای بەرەنگاربوونەوەی لەشفرۆشی ساڵی 1988ی هەموارکردەوە و بەشێوەیەکی فەرمی کارى هاوڕەگەخوازی و گۆڕینی رەگەز و گۆڕینەوەی هاوسەری قەدەغەکرد.
بەگوێرەى هەموارى یاساکە، سزای کارى هاوڕەگەزخوازی و گۆڕینەوەی هاوسەرەکان و گۆڕینی رەگەز، زیندانیکردنە لە نێوان 10 بۆ 15 ساڵ.
دوابەدوای پەسەندکردنی یاساکە، ئەمریکا دەستبەجێ نیگەرانی خۆی دەربڕی و پێیوایە ئەو هەموارە یاساییە دەبێتە هۆکارى بەرتەسکردنەوەی ئازادییەکان و کەمبوونەوەی توانای عێراق بۆ راکێشانی وەبەرهێنانی بیانی.
ماتیۆ میلەر، گوتەبێژی وەزارەتی دەرەوەی ئەمریکا، لە هەژمارى تایبەتی خۆی لە تۆڕی کۆمەڵایەتی X نوسیویەتی "هەست بە نیگەرانی قووڵ دەکەین لەبەرامبەر پەسەندکردنی هەموارى یاسایی بەرەنگاربوونەوەی لەشفرۆشی و هاوەڕگەزخوازی لە عێراق".
ئاماژەی بەوەشکردووە "ئەم هەموارە دەبێتە هۆی درووستکردنی هەڕەشە بۆ ئەو چینانەی زیاتر لە ژێر مەترسیدان لە عێراق و دەبێتە هۆی لاوازبوونی توانای عێراق بۆ جۆراوجۆرکردنی ئابوورییەکەی و راکێشانی وەبەرهێنەرانانی بیانی".
لەلایەکی دیکەوە، رێکخراوی لێبوردنی نێودەوڵەتی بۆچوونی وایە "هەموارکردنەوەی یاسای بەرەنگاربوونەوەی لەشفرۆشی کە رۆژی 27ی نیسان پەسەندکرا، دەبیتە مەترسی راستەقینە بۆ سەر ئەو عێراقییانەی رۆژانەی رووبەڕووی گێچەڵ دەبنەوە".
-Channel8