"دەنگی ئەمەریکا و ئیندپێندنت" چۆن مامەڵە لەگەڵ یەک بابەتی ڕۆژنامەوانی دەکەن؟ (هەڵوێستی حەشدی شەعبی بەنمونە)
PM:12:22:16/05/2019



"دەنگی ئەمەریکا و ئیندپێندنت" چۆن مامەڵە لەگەڵ یەک بابەتی ڕۆژنامەوانی دەکەن؟

(هەڵوێستی حەشدی شەعبی بەنمونە)


ئاماده‌كردنی‌ غازی‌ حه‌سه‌ن 
بەرایی
هۆکاری هەڵبژاردنی ئەم بابەتە چۆنیەتی بەکارهێنانی بابەت و بەدیهێنانی مەبەستەکانە لەکاری ڕۆژنامەوانیدا. ڕاگەیاندنی کوردی کێشەی چۆنیەتی خەبتینی لەگەڵ بابەت و بەکارهێنانی زانیاری و هەڵبژاردنی مانشێت و وێنە و داڕشتنی پێشەکی و نووسینی خودی هەواڵەکە و زەقکردنەوەی ڕووداوی سەرەکی و کارەکتەرەکان و دیاریکردنی ناونیشانی لاوەکی لەنێو بابەتەکە و شێوازی نووسینەوەی قسەی قسەکەرەکان و بەرجەستەکردنی مەبەستە سەرەکییەکانی  ئاخێوەر/ قسەکەر و خودی دەزگا ڕۆژنامەوانییەکەشی هەیە. 

بۆ شڕۆڤەی ڕۆژنامەوانی، باسی چۆنیەتی مامەڵە لەگەڵ یەک بابەت لەدوو دەزگای بەنێوبانگی جیهانی دەکەین.  دەمانەوێت ئاماژە بە(مەبەستی هەڵبژاردنی ناونیشان) و (ئامانجی بڵاوکردنەوە) و (پیشەیی بوون) و (لایەنگیری و هەڵگێڕانەوەی واقیع) و چۆنیەتی دەرکەوتنی مەبەستە سەرەکییەکانی نێو گوتاری هەواڵەکە لەچوارچێوەی بابەتەکە بکەین.

کەرەستەی شیکردنەوەکەمان
هەواڵێکی ڕۆژی ١١ی ئایاری ٢٠١٩ ەی (دەنگی ئەمەریکا بەشی کوردی/ دەقە نووسراوی ماڵپەڕەکەی و ڕۆژنامەی (ئیندپێندنت)ی بەنێوبانگی بەریتانییە. بابەتەکە دوو لێدوانە لەلایەن دوو کەسی بەرپرس و پەیوەندی بەهەڵوێستی حەشدی شەعبی لەبارەی ململانێی نێوان ئەمەریکا و ئێرانەوە هەیە. هەردوو هەواڵەکەش لە(باس نیوز/ هەولێر) و (ئاوێنە / سلێمانی) بڵاوکراوەتەوە. 

رێبازی لێکۆڵینەوەکەمان 
شیکردنەوەیەکی بەراوردکاریی و وەسفی و کارەکییە.


بۆچی ئەم کارە دەکەین؟
لێکدانەوەی هەواڵە بۆ ئەوەی گرنگی و چۆنیەتی مامەڵە لەگەڵ ڕووداو و بابەت و زانیارییەکان دەربخەین و مەبەستە سەرەکییەکانی (قسەکەر ) و (دەزگا ڕۆژنامەوانییەکە) و (بەکارهێنانەوەی بابەتەکە لای دەزگا وەرگرەکانی دیکەوە) و ئینجا (لایەنگیریی لەداڕشتن و شێوازی بڵاوکردنەوەی هەواڵەکە) و (پیشەیی) بوون شی بکەینەوە و هاوکاری ڕۆژنامەنووسانی کوردستانیش بکەین، چۆن لەهەڵبژاردنی شێواز و مەبەست و بەدیهێنانی ئامانجەکانیان لەچوارچێوەی کاری پیشەیدا هەنگاوبنێن.

دەنگی ئەمەریکا و ئیندپێندنت دەبێژن

لە ئیندپێندنت  وەرگیراوە و ناونیشانە کوردیەکەی (باس نیوز) بەم جۆرە داڕێژراوەتەوە: "حەشدی شەعبی هەڕەشە دەکات: عێراق دەکەینە ڤێتنامێکی دیکە". ئەمە نێوەڕۆکی قسەکانی هادی عامرییە، کە ئامۆژگاری دۆناڵد ترەمپ دەکات و دەڵێت: پێویستە ترەمپ یەکەمجار خەمی چارەسەرکردنی کێشە ناوەخۆییەکانی ئەمەریکا و کۆنگرێس بێت نەک عێراق بۆ یەکلاکردنەوەی ململانێکانی لەگەڵ ئێران، بەکار بهێنێت" ئەو فەرماندەیەی حەشدی شەعبی ھۆشداری دەداتە ئەمەریکا و هەڕەشە دەکات، کە لەئەگەری بەکارهێنانی عێراق لەململانێکاندا، ”ئەوا عێراق دەکەینە ڤێتنامی دووەم بۆ ئەمریکییەکان و تووشی شکستیان دەکەین". 
لەم زانیاریانە چەند ڕاستەییەک بەرجەستە دەبێت:
(هادی عامری قسەکانی ئاراستەی ئەمەریکایە، واتە ئەمەریکا نیازی خراپە، ئەمەریکا تاک لایەنانە سەرچاوەی کێشەکانە).

(هادی عامری خۆی بەوریا و هوشیار و زانا دەزانێت، ئامۆژگاری دۆناڵد ترەمپ دەکات، ترەمپش کەسێکی نەزان و بێ ئاگایە لەڕووداوەکان، پێویستە خۆی بەکێشەی نێوەخۆیی ئەمەریکا خەریک بکات).
(هادی عامری هەڕەشە دەکات، لەهەر ئەگەرێکی بەکارهێنانی عێراق، عێراق لەئەمەریکییەکان دەکەنە ڤێتنامی دووەم).

مەبەستەکانی ئیندپێندنت چییە، لەم هەواڵە؟
(دەرخستن و ئاشکراکردنی هەڵوێستی حەشدی شەعبیە لەکاتی هەڵگیرسانی جەنگ لەنێوان ئەمەریکا و ئێران). (خوێندنەوەی باری دەروونی سەرکردە و هێزەکانی حەشدی شەعبییە). (ئاشکراکردنی پەیوەندی نێوان ئێران و حەشدی شەعبییە). ئیندپێندنت مەبەستی (بیرخستنەوەی ئەمەریکا بەتێکشکانەکانی لە ڤێتنام، کە بۆتە بەشێک لەبیرەوەری ئاڵۆزی ئەمەریکییەکان). (ئاشکراکردنی سەرچاوەی هەڕەشەیە دژی ئەمەریکا). (پێم وایە مەبەستی سەرەکی هەواڵەکە خزمەتی عێراق و ئێران و خودی حەشد) ناکات. (هانی ئەمەریکا دەدات، بیر لەلێدان و کەمکردنەوەی ڕۆڵی حەشدی شەعبی بکاتەوە)، چونکە هادی عامری عێراق دژی ئەمەریکا دەکاتە ڤێتنام. 

مەبەستی بڵاوکردنەوەی لەلایەن (باس نیوز)ەوە
(لایەنگیری بابەت و زانیارییەکانی نێو هەواڵەکەی ئیندپێندنت)ە. (پشتڕاستکردنەوەی ئەو زانیاریانەیە، کە هەڵوێستی حەشد لەبارەی ناکۆکییەکان پێشان دەدات). (بەشێکی زۆری مەبەستەکانی ڕۆژنامەی ئیندپێندنتی پێ ڕاستە، یان لایەنگیری مەبەستەکانی دەکات). لەڕووی فکری و سیاسی و ئایدیۆلۆجییەوە (باس نیوز) لەگەڵ ئامانج و بوونی حەشد هەڵناکات. 

 دەنگی ئەمەریکا بەشی کوردی بڵاویکردۆتەوە و (ئاوێنە)ش جارێکی دیکە هەواڵەکەی بڵاوکردۆتەوە، کە مانشێتەکەی بەم جۆرەیە: " عەلی حوسێن وتەبێژی‌ حەشد: نابینە بەشێک لەململانێی‌ نێوان ئێران و ئەمەریکا".  گوتەبێژی حەشد لەباکوری عێراق دەڵێت "ئێمە ئێرانی‌ نین تا بەرگری‌ لەدەوڵەتێکی‌ تر بکەین، ئێمە بەشێکین لەسستمی‌ سەربازی‌ عێراق، عێراق نابێتە گۆڕەپانی هێرشکردنە سەر ئێران". وتی‌"وەزیری‌ دەرەوەی‌ ئەمەریکا هاتە بەغدا، دەرکەوت عێراق شەڕی‌ ئابوری‌ لەدژی‌ ئێران و بۆ بەرژەوەندی‌ ئەمەریکا ناکات".
لەبەشێکی قسەکانیدا ئاماژە بەپەیوەندی پێشمەرگە لەگەڵ ئەمەریکا دەکات، وەکو دۆخێکی بەراوردکاری لەنێوان حەشد وەکو ئینتمای مەزهەبی و پێشمەرگە.

مەبەستەکانی ئەم هەواڵەی دەنگی ئەمەریکا و جارێکی دیکە بڵاوکردنەوەی لەئاوێنەی سلێمانی چییە؟. (حەشدی شەعبی دامەزراوەیەکی دەستوریی و یاساییە). (بەشداری ململانێکان ناکات و ئێرانی نین). ( عێراق بێلایەن دەبێت لەململانێی نێوان ئەمەریکا و ئێران). (عێراق شەڕی ئابوری دژی ئێران بۆ بەرژەوەندی ئەمەریکا ناکات). (ئەمەریکا بەرژەوەندی لەپەرەپێدانی ململانێکان هەیە). (ئێران غەدرلێکراوە). 

مەبەستی دەنگی ئەمەریکا لەبەرهەمهێنان و بڵاوکردنەوەی ئەم هەواڵە چییە؟
(لایەنگیری بۆ حەشد پێوە دیارە). (ئەمەریکا ململانێکان پەرەپێ دەدات و هۆکارە بۆ کێشەکان). (حەشد میلیشیا نییە و بەشێکە لەدامەزراوەی سەربازی، کە ئەمەریکا ڕاهێنانی پێ دەکات و پڕ چەکی دەکات). دەنگی ئەمەریکا (پێشمەرگە و حەشد وەکو یەک سەیر دەکات). (پەیامێکە خزمەتی ئێران دەکات). (ڕای گشتی دژی سیاسەتی ترەمپ دەجولێنێت، ئێران بەغەدرلێکراو پێشان دەدات). (وا پیشان دەدات، ئێران هیچ ڕۆڵێکی لەعێراق نییە). 

مەبەستی ئاوێنە چییە؟
لایەنگیری هەواڵەکە دەکات و بەلایەنی کەمەوە بەهەواڵێکی گرنگ و گونجاو لەگەڵ سیاسەتی بڵاوکردنەوەی خۆی دەزانێت. بەپێی لۆژیک لەدووبارە هەڵبژاردنەوەی هەربابەتێک بۆ بڵاوکردنەوەی لەڕۆژنامە و پێگە ئەلەکترۆنیەکەی ، کارێکی ئارەزوومەندانەیە و بڕوا و متمانەی بەقسە و بۆچوونە بڵاوکراوەکەی نێو هەواڵەی دەنگی ئەمەریکا هەیە و بەبابەتێکی گرنگی دەزانێت، جۆرێک لەلایەنگیری چ بۆ سەرچاوەکە، یان بۆ نێوەڕۆک و زانیاری نێو هەواڵەکە، یان لایەنگیری لەقسەکەر و کارەکتەری هەواڵەکە پیشان دەدات.  دەردەکەوێت ئاوێنەش لایەنگیری نێوەڕۆکی دەقە هەواڵەکەی دەنگی ئەمەریکایە و لەم ڕێگەیەشەوە لەڕووی فکرییەوە پاڵپشتی ئەو مانشێتە دەکات و بانگەشە بۆ حەشد دەکات.

 گریمانەی ئەوە دەکرێت ئاوێنەش وەکو چۆن دەنگی ئەمەریکا لەهەواڵەکەی دەیەوێت حەشدی شەعبی بەئەرێنی و لاشەڕ و بێلایەن پیشان بدات و بەپێچەوانەی هەقیقەتی خۆی و بەهەڵگەڕاوەیی پێناسەی حەشد دەکات. لەکردەوەدا حەشد هێزێکی میلیشیایی مەزهەبی سەر بەئێرانن و بەئەمری ئەوانیش دەجووڵێنەوە. بۆیە بەرهەمهێنانی هەواڵێکی لەم جۆرە و دووبارە بڵاوکردنەوەی جۆرێک لە "شێواندن و بەناڕاست وەسفکردن و بەهەڵگەڕاوە پیشاندانی هەڵوێست و وێناکردنی هزر و بۆچوونی ئەو لایەنە" دەگرێتەوە. لەکاری ڕۆژنامەوانیدا ئەم کارە پشت بە"لایەنگیری و سۆز و هەلگەڕاندەوەی هەقیقەت و واقیع" دەبەستێت.

واتا (پاڵپشتی راپۆرتەکە هەواڵەکەی دەنگی ئەمەریکا دەکات).  ( بەجۆرێک حەشد وێنا دەکەن، کە پێچەوانەی بانگەشە و وەسفەکانی ئەمەریکایە). (حەشد بەشێکە لەدامەزراوەیەکی دەستوری). (ئێران خاوەنی کێشە و ئاراستەی خراپ نییە، ئەمەریکا دۆخەکە بەرەو گرژی دەبات). (لایەنگیری وێنا و وەسفەکانی سیاسییەکانی حەشدە). 

بەکورتی
هیچ دەزگایەکی ڕاگەیاندن بێ مەبەست بابەت و هەواڵەکانیان بڵاوناکەنەوە.  بەشێوەیەکی گشتی لایەنگری لەهەڵبژاردن و داڕشتنەوە و هۆکاری بڵاوکردنەوەی هەواڵ و بابەتەکاندا بەدی دەکرێت. پیشەیی بوون لەکاری ڕۆژنامەوانیدا بەردەوام لەژێر پرسیار و گومان دایە.  لەم دوو هەواڵەشدا، کە لەچوار شوێن بڵاوکراوەتەوە بەزەقی مەبەستی سیاسی و لایەنگیری لەهەڵبژاردن و چۆنیەتی داڕشتنەوە و هەڵبژاردنی مانشێتە سەرەکیەدا بەدی دەکرێت. لەوەی ئیندپێندنت (هەڕەشە و هەڵوێست و بوونە بەشێک لەململانێکان بەقسەی عامرییەوە دیارە)، ( ئیندپێندنت حەشد وەکو سەرچاوەی نیگەرانی و هەڕەشە دژی ئەمەریکا و لەکۆتایشدا پاڵپشتی ئێران پیشان دەدات). 

دەنگی ئەمەریکا (بێلایەن بوون و بوونە بەشێک لەسیستەمی گشتی و زەقکردنەوەی نیازپاکی لەقسەکانی حەشد دەردەخات) و (دڵنەوایی بە ئەمەریکا دەدات، کە حەشد بەشێک نابێت لەبەرنامەی ئێرانی. مەبەستی ئەوەیە مەترسی هێرشکردنە سەر حەشد کەم بکاتەوە و ئەو بانگەشانە ڕەت دەکاتەوە، کە دەڵێن حەشد عیراق دەکاتە ڤێتنامێکی دیکە دژی ئەمەریکا). بڕیار لای خوێنەرە، نەک بڵاوکەرەوەی هەواڵ و ڕۆژنامەنووسەکە.

لەهەردوو دۆخدا (ئەمەریکا بەپێی قسەی حەشد تاوانبارە، ئێران وەکو غەدر لێکراو ئاماژەی بۆ دەکرێت). داڕشتنی ناونیشانی یەکەم هوشداری دانە بە ئەمەریکا، پێویستە بەهەڵە عێراق دژی ئێران بەکار نەهێنێت، حەشد مەترسیدارە. کەچی لەدەنگی ئەمەریکا دڵنەوایی و ئارامکردنەوەی تێدایە و ڕای گشتی بەرەو ئاراستەیەک دەبات لەگەڵ بانگەشەکانی ئەمەریکا هاوتەریب نییە، چونکە ڕاشکاوانە وەکو مەبەستی سەرەکی لەمانشێتەکەی دەردەکەوێت و بڕوای وایە حەشد نابێتە بەشێک لەململانێکان و بێدەنگ دەبێت، مەبەستی ئەوەیە ئاساییە عێراق لەدژی ئێران بەکاربهێنرێت، چونکە حەشد بێلایەن دەبێت. لەم بوارەشدا حوکم و بڕیار لای خوێنەرە، کە بەپشت بەستن بەزانیارییەکان پێچەوانەی ئەم وێناکردنە بیر دەکاتەوە. 

دووبارە بڵاوکردنەوەی هەواڵەکان لە{باس نیوز و ئاوێنە} وەکو بەشێک لەجیاوازی تێڕوانینی سیاسی  هەولێر و سلێمانی (پارتی و یەکێتی) لەبارەی ڕوووداوەکان و تێفکرینیان دەربارەی حەشدی شەعبی و پێشکاتەکان دەردەکەوێت. لەبنەڕەتدا داڕشتن و شێوازی نووسین و هەڵبژاردنی مانشێتەکەی دەنگی ئەمەریکا بەشی کوردی و جارێکی دیکە بڵاوکردنەوەی لەئاوێنە، وەکو بەشێک لەتێڕوانینی زاڵی سلێمانی و هەڵوێستیان لەبارەی حەشدی شەعبی بەگشتی دەردەکەوێت.  
من وەکو شرۆڤەکار و خوێنەرێکی ئەم بابەتەش لەڕووی دەروونی و سیاسییەوە بەقووڵی هەست بەلایەنگیری و شاردنەوەی هەقیقەتی (بۆچوون و بیرکردنەوە و پێکهاتە و کەسایەتی) حەشد لەبابەتەکەی دەنگی ئەمەریکا دەکەم، پێچەوانەی بابەتەکەی ئیندپێندنت، کە بەگشتی پیشەیی بوون و بێ پاساو هێنانەوە بۆ شاردنەوەی هەقیقەتی پێوەدیارە و بنەمای سەرەکی بیرکردنەوەی حەشدی (لەبەڤێتنام کردنی عێراق دژی ئەمەریکا) واقیعیانە دەرخستووە.

بابەتەکەی دەنگی ئەمەریکا بەشی کوردی پەیامنێرێکی کورد، ئامادەی کوردە، لەکاتێکدا ئەم بەشە کوردییە بایەخ بە بابەت و زانیاری و جوگرافیای کوردی دەدات، کەچی بۆ پیشاندانی (لاشەڕی حەشد) چۆتە سنووری جوگرافیای عەرەبی و لەبەشێکی ڕاپۆرتە هەواڵەکەدا (پێشمەرگە تۆمەتبار دەکات بەدۆستایەتی ئەمەریکا) و (حەشد و پێشمەرگەش لەئاستی نەرێنی و خراپدا لەگەڵ یەکتر بەراورد دەکات).    
 لەم شیکردنەوەیەدا دەگەیەنە ئەو ڕاستیەی بەپێی نێوەڕۆک و مەبەستەکانی ئەم دوو دەقە هەواڵە دەردەکەوێت لەدەنگی ئەمەریکا (حەشد شەڕاوی نییە و نابێتە سەرچاوەی هەڕەشە و بۆچوونەکانی خودی ئەمەریکا دروستکراون دژی حەشد، ئێران هەڕەشەی لێ دەکرێت). لەبابەتەکەی ئیندپێندنتدا (حەشد بەهێزە و هەڕەشە دەکات و ئامۆژگاری ترەمپ دەکات و لایەنگیری شەڕ و ئێرانە. بەهیچ جۆرێک قسەکەر ناوی ئێران نابات، واتە ئێران غەدرلێکراوە). زۆر گرینگە ڕۆژنامەنووسان لەهەڵبژاردنی بابەت و نووسینەوە و داڕشتنی دەق و هەڵبژاردنی ناونیشان و بەکارهێنانی دەستەواژەکان ئاگاداری بنەمای سەرەکی کارەکەیان لەبواری (پیشەیی بوون) خۆدوورگرتن (لەلایەنگیریی) و (پاڵپشتی بابەت و بۆچوونەکان) بن. گەلێک جار تەنیا تۆمارکردنی قسەکان و بڵاوکردنەوەی هەواڵەکە، بێ بیرکردنەوە لەنێوەڕۆک و ئاکام و مەبەستی لێدوانەکان و پشت ڕاست نەکردنەوەی زانیارییەکان، ئەنجامێکی پێچەوانەی هەقیقەت و بەرژەوەندی گشتی و گوتارێکی هەڵگەڕاوە بەرهەم دەهێنێت و دەبێتە سەرچاوەیەکی مەترسیدار بۆ شێواندن و شاردنەوەی هەقیقەتی زانیارییەکان و خوێنەر دووچاری گرژی و نیەگرانی و بەرهەمهێنانەوەی گوتارێکی شێواو دەکات.

لایەنگیری هەر بەتەنیا ئەوە نییە، ڕۆژنامەیەک بەئاشکرا بانگەشە بۆ گروپ و کەسێک و زانیارییەک بکات، دەرفەت دروستکردن بۆ ئەوەی "درۆ و هەڵگێڕانەوەی ڕاستی و خۆپیشاندان بەپێچەوانەی هەقیقەتی خودی بابەت و مەبەستەکان" بەشداری کردنە لەشێواندن، شێواندنیش ئەگەر سەرتاپای درۆ نەبێت، ئەوە بەشێکی گرنگی درۆ پێک دەهێنێت،  ئەمەش دەبێتە بەشێک لەلایەنگیری و شێواندنی ڕاستی و بەهەڵگەڕاوە پیشاندانی هەقیقەت و دروستکردنی وێناکردنێکی هزری و مادی شێواوی نادروست.

دەقی هەردوو هەواڵە:
حەشدی شەعبی هەڕەشە دەکات: عێراق دەکەینە ڤێتنامێکی دیکە 
 فەرماندەیەکی باڵای میلیشیاکانی حەشدی شەعبی هەڕەشە دەکات و رایدەگەیەنێت، کە عێراق دەکەنە ڤێتنامێکی دیکە.

ھادی عامری، ئەمینداری گشتی رێکخراوی بەدر و فەرماندەی باڵای حەشدی شەعبی لە چاوپێکەوتنێکدا، بە رۆژنامەی (ئیندیپێندت)ی بەریتانی رایدەگەیاندووە، دۆناڵد ترەمپی سەرۆکی ئەمریکا وڵاتەکەی. لاواز کردووە.
هادی عامری ئامۆژگاریی دۆناڵد ترەمپ دەکات و رایگەیاندووە، ”پێویستە ترەمپ یەکەمجار خەمی چارەسەرکردنی کێشە ناوخۆییەکانی ئەمەریکا و کۆنگرێسی بێت نەک عێراق بۆ یەکلاکردنەوەی ململانێکانی لەگەڵ ئێران، بەکار بهێنێت".

ئەو فەرماندەیەی حەشدی شەعبی ھۆشداری دەداتە ئەمەریکا و هەڕەشە دەکات، کە لە ئەگەری بەکارهێنانی عێراق لە ململانێکاندا، ”ئەوا عێراق دەکەینە ڤێتنامی دووەم بۆ ئەمریکییەکان و تووشی شکستیان دەکەین".
ھادی عامری جەزختی لەوە کردووەتەوە، کە رێگا بە ئەمریکا نادەن لە عێراقەوە شەڕ دژی وڵاتانی دراوسێی عێراق بکات و ئەو وڵاتە ”بکاتە ناوچەیەکی چاودێریکردن بەسەر وڵاتانی ناوچەکە و یەکلاکردنەوەی کێشەکانی".
http://www.basnews.com/index.php/so/news/iraq/519941
وتەبێژی‌ حەشد: نابینە بەشێک لە ململانێی‌ نێوان ئێران و ئەمەریکا 
وتەبێژی‌ میحوەری‌ باکوری‌ عێراقی‌ حەشدی‌ شەعبی‌ دەڵێت، هێزەکانیان بەشێک نابن لە ململانێی‌ نێوان ئێران و ئەمەریکا، جەخت لەسەر ئەوەشدەکاتەوە عێراق ڕازی‌ نابێت وڵاتەکەی‌ بکرێتە گۆڕەپانی‌ ململانێ.
عەلی‌ حسەینی‌ وتەبێژی‌ حەشدی‌ شەعبی‌، بەدەنگی‌ ئەمەریکای‌ راگەیاند"ئێمە ئێرانی‌ نین تا بەرگری‌ لە دەوڵەتێکی‌ تر بکەین، ئێمە بەشێکین لە سستمی‌ سەربازی‌ عێراق و لە ژێر فەرماندەیی‌ سەرۆک وەزیرانداین."

وتیشی‌"گەر ئێمە نزیکی‌ ئێران بین لەبەر مەزهەب و شەڕی‌ بۆ بکەین، کەواتە پێشمەرگەش نزیکی‌ ئەمەریکایە، بۆیە مەسەلەی‌ پەیوەندی‌ دۆستایەتی‌ جیاوازە لە فەرمان و رەسمیات."

بەبڕوای‌ عەلی‌ حسێنی‌، عێراق نابێتە بەشێک لە ململانێی‌ نێوان ئەمەریکاو ئێران، وتی‌"وەزیری‌ دەرەوەی‌ ئەمەریکا هاتە بەغدا، دەرکەوت عێراق شەڕی‌ ئابوری‌ لەدژی‌ ئێران و بۆ بەرژەوەندی‌ ئەمەریکا ناکات."

سەبارەت بەهەبوونی‌ پەیوەندی‌ فەرمی‌ لەنێوان ئێران و بەشێک لە هێزەکانی‌ حەشدی‌ شەعبی‌، وتەبێژەکەی‌ حەشد رەتیکردەوە هیچ هێز و فەسیلەیەکی‌ سەربە حەشدی‌ شەعبی‌ لە ژێر فەرمانی‌ ئێرانیەکاندا بێت، وتی‌"هەر بڕیارێک لە ئەنجومەنی‌ وەزیرانی‌ عێراقەوە دەربچێت، ئێمە پابەند دەبین پێوەی‌."

لەکۆتایی‌ قسەکانیدا بۆ دەنگی‌ ئەمەریکا، عەلی‌ حسێنی‌ پێیوابوو ئەگەری‌ پێکدادانی‌ سەربازی‌ لە نێوان ئەمەریکا و ئێران لە ئارادا نیە، ئەو دەرهاویشتانەی‌ کە ڕوویانداوە وەکو خراپبوونی‌ دۆخی‌ ئابوری‌ ئێران و هەڕەشەکردن لەیەکتری‌ تەنها دەرئەنجامی‌ شەڕی‌ دەروونیە
https://www.awene.com/detail?article=4947
https://www.dengiamerika.com/a/iraq-iran-us/4910295.html