ئاواره‌كان په‌ناده‌به‌نه به‌ر بنكه‌یه‌كی كۆنی سه‌ربازی ئه‌مه‌ریكا له كۆبانێ
میترۆ، K24
كوردانی ئاواره‌ی رۆژئاوای كوردستان په‌نا ده‌به‌نه به‌ر بنكه‌یه‌كی سه‌ربازی پێشووی ئه‌مه‌ریكا له كۆبانێ، بۆ ئه‌وه‌ی خۆیان له بۆردومانه‌كان بپارێزن.
بنكه سه‌ربازییه‌كه ده‌كه‌وێته نزیك شارۆچكه‌ی "خه‌راب عه‌شك"ی سه‌ر به كۆبانێ و ئاواره‌كان داوا ده‌كه‌ن پارێزگاری له منداڵه‌كانیان بكرێت له‌و هێرش و په‌لامارانه‌ی ده‌كرێنه سه‌ر رۆژئاوا.
به‌هۆی هێرش و په‌لاماره‌كانیش، ژماره‌یه‌كی یه‌كجار زۆری خێزان له كۆبانێ و ده‌وروبه‌ری ئاواره‌بوونه و ئێستا بنكه‌یه‌كی كۆنی سه‌ربازی ئه‌مه‌ریكیان كردووه‌ته په‌ناگه.
ئێستا ره‌وشی ئاواره‌كان له خراپیدایه و به‌بێ پێداویستییه سه‌ره‌كییانی ژیانن و پێویستیان به هاوكاری مرۆیی هه‌یه.
یه‌كێك له ئاواره‌كان، به‌ناوی كلیندا ئه‌حمه‌د، باس له‌وه ده‌كات سێ رۆژه له‌وێنه و له گوندی عه‌لی شیاری سنووری هه‌ڵاتوون و له ترسی تۆپبارانی هه‌ڕه‌می و ترسی گیانی خۆیان په‌نایان بردووه‌ته به‌ر بنكه‌كه، كه پێشتر ئه‌مه‌ریكییه‌كان له‌وێ بوونه و ئێستا كشاونه‌ته‌وه.
PM:05:47:12/10/2019
ئه‌م بابه‌ته 268
جار خوێنراوه‌ته‌وه