ئافرەتێك كار بۆ زیاتر سەوز كردنی نیشتمان دەكات
PM:12:05:11/03/2020
ميترۆ، زاری كرمانجی

رەمەزان هەرنی- دهۆك: چیان مەهدی چالاكوانی دیاری پارێزگای دهۆك كە بە چیان كوردستانی ناسراوە لە زۆربەی بۆنەو چالاكییەكانی دهۆك دەبیندرێت و ماوەی 13 ساڵە لە كاری رێكخراویی و بواری ژینگەو ئافرەتان خزمەت دەكات.

چیان بۆ زاری كرمانجی باس لە كارو چالاكییەكانی دەكات و دەڵێ‌"بەهۆی كاركردنی بەردەوامم لە بواری گشتی و مەیدانیدا، زۆرشتم لە دەستداوەو خەریكە خۆشم ون دەكەم، بەڵام لەگەڵ ئەوەشە هەستم بە ماندووبوون و بێزاری نەكردووەو پەشیمانیش نیم لە خزمەتكردن بە كۆمەڵگەو لە هەر شوێنێك پێویستی بە یارمەتی من بێت، ئامادەی خزمەتكردنم"،
چیان كاری خۆبەخشی خۆی دەگەڕێنێتەوە بۆ دڵسۆزییەكەی بۆ كۆمەڵگەو پێی وایە هیچ هەستێك بە قەد ئەوە دڵخۆشكەر نییە كە بە هۆی كارێكەوە بزە دەخەیتە سەر لێوی منداڵێكی هەژار و دەڵێ‌"هەست بە خوشییەكی گەورە دەكەم، كە توانیوومە بەرێژەیەكی زۆر كاری خێرخوازی بكەم و زەردەخەنە بۆ لێوی منداڵێكی هەژار دروست بكەم"،
چیان لە رێكخراوێكی پەیوەست بە پاراستنی ژینگە كار دەكات و خوازیاری ئەوەیە لە دوا رۆژدا دەستی بەهەموو شارێك بگات لەپێناو پاك ڕاگرتنی ژینگەو سەوزكردنی نیشتیمانەكەی.