بە ڤیدیۆ؛ ئاسایشی سلێمانی هێرشیان کردە سەر کامێرامانی ناس کورد
PM:06:51:22/03/2020

ئەمڕۆ لەکاتی ڕوماڵی ڕاستەوخۆدا هێزەکانی ئاسایشی سلێمانی هێرشیان کردە سەر کامێرامانی دەزگای ناس کورد و لێیان دا.

.

ئەمڕۆ یەکشەممە، 22ی ئازاری 2020، کاتێک ئاودیر عومەر، کامێرامانی دەزگای ناس کورد ڕوماڵی دانانی بازگە و سەرپێچی هاوڵاتیانی کرد بۆ قەدەغەکردنی هاتوچۆ، هێزێکی ئاسایشی سلێمانی هەڵیانکوتایە سەر ناوبراو و پاش ئازاردانێکی زۆر، موبایلەکەیان لێ سەندووە و وێنە و ڤیدیۆکانیان سڕیوەتەوە.

.

دواتر هێزەکانی ئاسایش ئاودێر عومەریان بردووە و بۆ ماوەیەک لە ئۆتۆمبێلی ئاسایشدا ئازاریان داوە و قسەى ناشرینیان پێ وتووە.

.

ئازاردانی کامێرامانەکەى ناس کورد لەکاتێکدایە کە دەزگاکە مۆڵەتی کارکردنی بۆ ستافەکانی دەرکردووە لەڕووی یاساییەوە هیچ کێشەیەکی نییە.

.

دەزگای ناس کورد سەرکۆنەى ئەو هێرشە دەکات کە پێشێلکارییەکی ڕوونە لەدژی ئازادی ڕادەربڕین و ڕوماڵکردنی ڕۆژنامەنوسان.

لێدەری ڤیدیۆ
00:00
00:10

دەقی ڕونکردنەوەکە:

.

ڕونکردنەوەیەک لە دەزگای میدیایی ناسەوە

ئەمڕۆ 22ی ئازاری 2020، لە کاتی ڕوماڵی ڕاستەوخۆدا لە شاری سلێمانی کامێرامانی سایتەکەمان لەلایەن هێزێکی ئاسایشەوە ڕێگیری لێکراو و ئازار درا، ئازاردانی ئاودێر عومەر لە کاتێکدایە کە ناوبراو هەموو بەڵگەنامەیەکی فەرمیی پێبوو کە ڕێی پێدەدات بە وێنەگرتن و ڕوماڵکردن.

.

دەزگای میدیایی ناس بەداخەوەیە بۆ ئەم رووداوە کە لە ئەنجامی ناسکی بارودۆخەکە و گرژیی دەروونیی تاکەکەسەکانەوە ڕوویداوە، و دووپاتی دەکاتەوە کە بە رێز و پێزانینەوە دەڕوانێتە ماندووبوون و کۆششی هێزە ئەمنیەکان و، ئەوکات و ئێستا و لە داهاتووشدا پابەند دەبین بە ڕێنماییەکانی دەسەڵاتە ئەمنی و ئیدارییەکانی شارەکەمان و لە چوارچێوەیاندا ئازادییە ڕۆژنامەگەرییەکان پیادەدەکەین لە پێناوی گەیاندنی زانیاری و رووداوەکان بە خەڵکی شارە ئەزیزەکەمان و گشت خوێنەر و بینەرانمان.

.

بەڵام دەزگاکە سەرکۆنەى هەر هەوڵێک دەکات بۆ پێشێلکردنی مافی ڕۆژنامەنوسان و ئازادی ڕادەربڕین.

22ی ئازاری  2020

دەزگایی میدیایی ناس کورد