سەنتەرێ میترۆ: ڕۆژنامەڤان قارەمان شوکری ب نەیاسایی هاتیە دەستەسەرکرن، پێدڤیە بهێە ئازادکرن
AM:12:01:08/07/2020


سەنتەرێ میترۆ: ئیدانەیا بەرتەسکرنا کارێ میدیایی ژئالیێ دەستەڵاتێڤە ل بەهدینان دکەین

ڕۆژنامەڤان قارەمان شوکری ڕێکانی دەمێ ۱۱ ڕۆژانە ژ ئالیێ ئاسایشا شێلادزێڤە دەستگیرکریە و پاشی ڕەوانەی ئاسایشا گشتی یا دهۆک کریە، ئەڤە ژی بەرۆڤاژی یاسایا ڕۆژنامەگەری و یاسایێن کارپێکریە، پێدڤیە لگور یاسایێ مامەڵە دگەلدا بهێتە کرن، نەک د کونجێن زیندانێدا بمینیت.

لگور گوتنا نعمەت ڕێکانی مامێ ڕۆژنامەڤانی، ڕۆژا شەمبی رێکەفتی ٢٧/٦/٢٠٢٠ ئاسایشا شێلادزێ چۆیە ماڵا قارەمانی و دەستپێکێ گوتیە دەیکا وی تنێ مە چەند پرسیارەکێن لێ هەین و دێ زڤڕینین، بێ بڕیارا دادوەری دگەلدا بیت دەستەسەرکرنە و پاشی داخوازا موبایلا وی کرینە و مە ژی ڕادەست نەکریە.

پاشی قارەمان بۆ ئاسایشا گشتی یا دهۆکێ هاتیە ڤەگوهاستن، تا نوکە ڕێ ب مە نەهاتیە دان ببینین.
ڕەمەزان ئەرتیسی سەرپەرشتیارێ گروپێ پارێزەرێن خۆبەخش بۆ میترۆ دبێژیت: پارێزەرێن مە هەوڵداینە قارەمانی ببینین بۆ وەرگرتنا بریکارنامەیەکا یاسایی، لێ مە نە شیاییە ببینین، پێدڤی بوو ژ ۲٤ دەمژمێران تا هەفتیەکێ گرتن (توقف) تەمام بایە و کەیساوی ڕادەستی دادگەهێ کربان.

لگور گوتنا کەسوکارێن قارەمانی، ئەو لسەر وێنەگرتنا بویەرێن شێلادزێ و چەند لێدوانەکان بویە بۆ دەزگەهێن میدیایی هاتیە دەستەسەرکرن، لێ ژئالیێ خۆڤە ئاسایشا دهۆکێ دوپاتدکەت ڕۆژنامەفانێ ناهڤاتی سەر کارێ ڕۆژنامەڤانی نەهاتیە دەستەسەرکرن و لجەم وان پاراستیە، هەر دەمێ ڤەکۆلین ژ ئالیێ وان تەمام بوو، دێ کەیسا وی چیتە دادگەهێ.

هەروها رێکەفتی ٢٦/٦/٢٠٢٠ ژ ئالیێ ئاسایشا دێرەلوکێ ڤە سەر ب قەزایا ئامێدیێ، کەلوپەلێن ڕۆژنامەڤانیێن تیما کەناڵێ ئێن ئاڕ تی (تایف گۆران و هندرێن سەردار ) و ڕۆژنامەڤانێ فریلانس (محەمەد عومەر) و موبایل و کۆمپیتەرێن شەخسی ژێ هاتینە وەرگرتن و هێشتا ل ئاسایشێ نە، ئەڤە ژی بێ بەرۆڤاژی یاسا و ئەتەکێتێن دەزگایێن ئەمنییە.

سەنتەرێ میترۆ ئیدانەیا دەستەسەرکرنا ڕۆژنامەڤان قارەمان شوکری دکەت و پێدڤیە دەزگەهێن ئەمنی ڕێزێ ل یاسایێن ڕۆژنامەڤانی بگرن، دەربارەی کارێ وان لگور یاسا ژمارە (۳٥) یا ساڵا ۲۰۰۷ێ و یاسایێن کارپێکری مامەڵێ دگەڵ ڕۆژنامەڤانان بکەن، ئێدی ئازادیا ڕادەربرینێ وکارێ میدیایی بەرتەسک نەکەن و ڕوویێ دیموکراسیێ پارێزگەها دهۆکێ نەشرین نەکەن.

ئەیهان سەعید - سەرپەرشتێ سەنتەرێ میترۆ ل پارێزگەها دهۆکێ
٧/٧/٢٠٢٠