"داوا لە حکومەتی هەرێم دەکەین مافەکانی خۆپیشاندەران جێبەجێ بکات "

کۆمیسیۆنی مافەکانی مرۆڤی عیراق داوای لە هێزە ئەمنییەکانی هەرێم کرد مافی خۆپیشاندەران پێشیل نەکەن و بە وریاییەوە مامەڵەیان لەگەڵدا بکەن، دەشڵێت، "داوا لە حکومەتی هەرێم دەکەین گوێڕایەڵی داواکارییەکانی خۆپیشاندەران بێت و مافە رەواکانیان جێبەجێ بکات".

کۆمیسیۆنی مافەکانی مرۆڤ لە عیراق راگەیاندراوێکی بڵاوکردەوە و تیایدا هاتووە: "بە نیگەرانییەوە چاودێری خۆپیشاندانەکانی هەرێمی کوردستان دەکەین، بەتایبەتی ئەو رووداوانەی لە کاتی خۆپیشاندانەکاندا روویاندا و لە ئاکامدا ژمارەیەک لە خۆپیشاندەران و ئەندامانی هێزە ئەمنییەکان برینداربوون و چەند باڵەخانەیەکی حکومیش سوتان و زیانیان پێگەیشت".

ئاماژە بەوەشکراوە: "ئێمە جەخت لە مافی خۆپیشاندانی ئاشتیانە دەکەینەوە کە لە دەستوری عیراقدا گەڵاڵەکراوە"، دەشڵێت، "داوا لە حکومەتی هەرێمی کوردستان دەکەین گوێڕایەڵی داواکارییەکانی خۆپیشاندەران بێت و مافە رەواکانیان لە بنەبڕکردنی بێکاری، باشترکردنی گوزەرانی هاوڵاتیان و خەرجکردنی موچەی فەرمانبەراندا جێبەجێبکات".

ئەوەش خراوەتەڕوو: "داواش لە هێزە ئەمنییەکانی هەرێمی کوردستان دەکەین بە وریاییەوە مامەڵە لەگەڵ خۆپیشاندەراندا بکەن و دانبەخۆیاندا بگرن و ژیانی خۆپیشاندەران بپارێزن و مافەکانیان پێشێل نەکەن".

باس لەوەشکراوە: "داواکارین خۆپیشاندەران پابەندی رێکارەکانی خۆپیشاندانی ئاشتیانە بن و دووربکەونەوە لە ئەنجامدانی توندوتیژی و دەستدرێژیکردنە سەر موڵکی گشتی".

پاش ئەوەی‌ لە رۆژی‌ 22ی‌ ئەم مانگەدا، بانگەواز بۆ خۆپیشاندانی‌ سەرتاسەری‌ کرا، هاوڵاتیان لە زۆربەی‌ شار و شارۆچکەکانی‌ هەرێم خۆپیشاندانی‌ ئاشتیانە و بەرفراوانیان سازکرد و دواتر چەند کەسێک لە چەند شوێنێک هەڵیان کوتایە سەر چەند دامودەزگایەکی حکومی و زیانیان پێگەیاند.

PM:01:55:24/08/2020

ئه‌م بابه‌ته 592 جار خوێنراوه‌ته‌وه‌‌