كاوە محمود باس لە سێ دیاردەی ناو میدیای كوردستانی دەكات
PM:05:15:15/10/2020

سكرتێری حزبی شیوعی كوردستان داوای لە سەنتەری میترۆ كرد سەرباری چاودێریكردنی یاساكانی رۆژنامەگەری و زانیاری، كار بكەن بۆ بەرەنگاربوونەوەی دیاردەكانی گوتارەكانی رق وكینە و پۆپۆلیستی و كاركردنی بۆ هۆشیاركردنەوەی كۆمەڵگا لە مەترسییەكانی هەواڵی درۆ، كە پێكەوە مەترسین بۆسەر ئاشتی كۆمەڵایەتی.
رۆژی پێنج شەممە كاوە مەحمود سكرتێری حزبی شیوعی كوردستان، بە یاوەری هاورێ گۆران حسێن ئەندامی سەركردایەتی، سەردانی ئۆفیسی سەرەكی سەنتەری میترۆی كرد لە شاری سلێمانی و بە گەرمی لە لایەن دەستەی بەرێوەبردن و ئەندامانی خۆبەخشەوە پێشوازی كران.
دیاری محمد بەڕێوەبەری سەنتەری میترۆ وێڕای بەخێرهاتن، تیشكی خستە سەر پرۆژەكانی سەنتەری میترۆ و رێبازی كاركردنی بە ئامانجی كۆكردنەوەی زۆرترین كەسایەتی سیاسی و كۆمەڵایەتی و رۆشنبیری و رێكخراوەكانی داكۆكیكاری مافەكانی مرۆڤ تا فشارەكان فراوانتر بن بۆ فراوانكردنی ئازادییەكان.
هاوڕێ كاوە محمود تیشكی خستە سەر هەندێ دیاردەی ناو میدیای كوردستانی كە زیاتر گرنگی دەدەن بە بڵاوكردنەوەی گوتاری پۆپۆلیستی و هەندێ جاریش گوتاری رق و كینە بەرامبەر ئەویدی جیاواز و تەشەنەكردنی هەواڵی بێ بنەما و درۆ هەڵبەستن، ووتی" ئەمانە نەك زیان بە پرنسیپەكانی ئازادی بەڵكو زیان بە دێمۆكراسییەت دەگەیەنن" جەختیكردەوە " بۆ ئەوەی پشتیوانی زیاترتان هەبێت رەخنە لەو دیاردانەش بگرن چونكە مەترسی ئەو دیاردانە كەمتر نین لە مەترسی و هەوڵەكانی بەرتەسككردنەوەی ئازادی رادەربڕین و رۆژنامەگەری كە ئێمە دژی دەوەستینەوە".
هەروەها چەندین پێشنیازی خستە بەردەم ستافی سەنتەری میترۆ لەوانەش داوای كرد چالاكییەكانی سەنتەر تەنها لە ناوەندی شارەكان قەتیس نەكرێن و گرنگی بدەن بە پرسەكانی رۆژنامەنوسانی ژن، قوربانیانی جینوسایدی شەنگال.
لەو كۆبونەوەی چەندین پرسیار دەربارەی رەوشی سیاسی لە عێراق و هەرێمی كوردستان، پرسی هەڵبژاردنی پێشوەختە لە عێراق، تەحەداكانی بەردەم سەرۆك وەزیرانی عێراق.