رێوڕەسمێک بۆ هەڵدانەوەی گۆڕە بەکۆمەڵەکە بەڕێوەدەچێت و لە سبەی یەکشەممەوە دەستدەکرێت بە هەڵدانەوەی گۆڕەکە، بەپێی زانیارییەکانی رووداو، ئەو ژنانەی لەو گۆڕەدا بەکۆمەڵ نێژراون، هەموویان تەمەنیان لە سەروو 40 ساڵانەوە بووە و خەڵکی گوندی کۆجۆن. 

 

لە رێوڕەسمەکەدا، نوێنەری سەرۆکوەزیرانی عێراق، نوێنەری وەزارەتی شەهیدان و ئەنفالکراوانی هەرێمی کوردستان، نوێنەری دەستەی لێکۆڵینەوە لە بەڵگەنامەکانی تاوانی شنگال لە هەرێمی کوردستان و ژمارەیەک لە کەسوکاری قوربانیان ئامادەن.

 

ژنێک کە خۆی خەڵکی کۆجۆیە و لەگەڵ ئەو کۆمەڵە ژنە بووە کە ئێستا رووفاتەکانیان دەردەهێندرێتەوە و لەلایەن داعش کوژران، بە رووداوی گوت، "دایک و خەسووی منی تێدایە.. ئەوانیش پیر نەبوون، زۆربەیان لە تەمەنی ئێمەدابوون". 

 

بە گوتەی ئەو ژنە، کاتێک چەکدارانی داعش دەستگیریان کردوون، لەگەڵ پیاوەکان جیایان کردوونەتەوە و "ژنەکان بە جیا و پیاوەکان بە جیا کوژراون". کەسوکاری ئەو قوربانییانە داواشدەکەن، بە زووترین کات ناسینەوە بۆ رووفاتەکان بکرێت "تاوەکو بزانین گۆڕەکانیان لە کوێن و سەردانیان بکەین". 

 

لە ساڵی 2014 داعش هێرشی کردە سەر شنگال، بەشێکی خەڵکەکەی کۆمەڵکوژ و بێسەروشوێن کرد، هاوکات دەیان هەزار کەس لە دانیشتووانی شارەکە کە کوردانی ئێزدی بوون، ئاوارەبوون. تاوەکو ئێستا لە شنگال 80 گۆڕی بە کۆمەڵ دەستنیشانکراون، مانگی کانوونی یەکەمی ساڵی 2019ـەش رووفاتی 235 کوردی ئێزدی لە گۆڕە بەکۆمەڵەکان دەرهێندران و رەوانەی بەغدا کران.

 

ئەنجامی پشکنینی دی ئێن ئەی ئەو رووفاتانە لە بەغدا تەواو بووە، بەڵام بەهۆی بڵاوبوونەوەی ڤایرۆسی کۆرۆنا، تاوەکو ئێستا نەدراونەتەوە بە کەسوکاریان. سبەی یەکشەممەش تیمێکی 40 کەسی دەست بە هەڵدانەوەی گۆڕە بە کۆمەڵەکەی ژنانی کوردی ئێزدی دەکەن.